वैदेशिक रोजगार विभागले वैदेशिक रोजगारीमा श्रमिक पठाउने इजाजतपत्र प्राप्त संस्थाहरूलाई विज्ञापन गर्दा अनिवार्य आधिकारिक सम्पर्क विवरण खुलाउन निर्देशन दिएको छ ।
विभागले जारी गरेको सूचना अनुसार श्रमिक माग गर्दै इजाजतपत्र प्राप्त संस्थाहरूले राष्ट्रियस्तरका दैनिक पत्रिकामा प्रकाशित गर्ने विज्ञापनमा संस्थाको आधिकारिक सम्पर्क व्यक्तिको नाम, सम्पर्क नम्बर र सम्पर्क स्थान उल्लेख गर्नुपर्ने व्यवस्था रहेको छ ।
तर, हाल प्रकाशित केही विज्ञापनमा आवश्यक विवरण नखुलाइएको पाइएको भन्दै विभागले आवेदन दिन चाहने व्यक्तिले सम्पर्क गर्न समस्या भएको जनाएको छ । यसकारण विभागले इजाजतपत्र प्राप्त संस्थाहरूलाई विज्ञापनमा अनिवार्य स्पष्ट सम्पर्क विवरण राख्न निर्देशन दिएको हो ।
त्यस्तै वैदेशिक रोजगारीका लागि मागपत्रमा पूर्वस्वीकृति आवेदन गर्दासमेत सम्बन्धित सम्पर्क व्यक्तिको नाम, नम्बर र ठेगाना खुलाउनुपर्ने र यदि यो प्रावधान कार्यान्वयन नभए कानुन बमोजिम कारबाही गरिने चेतावनी समेत विभागले दिएको छ ।
