राष्ट्र बैंकले पहिलो पटक घर खरिद वा निर्माण गर्ने व्यक्तिलाई ३ करोडसम्मको आवासीय घर कर्जा उपलब्ध गराउन सकिने व्यवस्था गरेको छ । मौद्रिक नीति कार्यान्वयनका लागि एकिकृत निर्देशन जारी गर्दै राष्ट्र बैंकले पहिलोपटक घर खरिद वा निर्माण गर्ने व्यक्तिलाई ३ करोडसम्मको आवासीय घर कर्जामा लोन टू भ्यालू रेसियो बढीमा ८० प्रतिशतसम्म कायम गर्न सकिने व्यवस्था गरेको हो ।
यसका लागि राष्ट्र बैंकले केही शर्त पनि तोकेको छ । जस अन्तर्गत ऋणी आफूले मात्र प्रयोग गर्ने गरी बढीमा ३ हजार वर्गफिटसम्मको घर/अपार्टमेन्ट हुनुपर्ने, कुनैपनि बैंक तथा वित्तीय संस्थाबाट यस पूर्व घर/अपार्टमेन्ट निर्माण वा खरिद कर्जा नलिएको यकिन गर्नु पर्ने, यस सुविधा अन्तरगत कर्जा प्रदान गर्दा घरभाडालाई ऋणीको आम्दानीको श्रोतको रुपमा देखाउन नपाइने र कर्जाको व्याजदर वृद्धि भएमा पूर्व निर्धारित मासिक किस्ता वृद्धि नगरी कर्जा भुक्तान हुने व्यवस्था मिलाउनुपर्ने भनिएको छ ।
यस्तै, रियलस्टेट कर्जा र सोको धितो सुरक्षणको फेयर मार्केट भ्यालू बीचको अनुपात बढीमा ५० प्रतिशतसम्म मात्र कायम गर्नु पर्ने यसअघिको प्रावधान यथावात राखिएको छ ।
निजी आवासीय घर कर्जा र नियमानुसार दर्ता भई सञ्चालनमा रहेका नेपाल सरकारबाट स्वीकृति प्राप्त घर निर्माण व्यवसाय कम्पनीहरु÷परियोजनाहरुलाई आवासीय घर निर्माणको लागि प्रदान गरिने कर्जाको हकमा लोन टू भ्यालू रेसियो बढीमा ७० प्रतिशतसम्म कायम गर्न सकिने व्यवस्था गरिएको छ । यसअघि यस्तो कर्जाको लोन टू भ्यालू रेसियो ६० प्रतिशत थियो ।
