असोज १०, ११ र १२ गतेको अविरल वर्षाले अवरुद्द भएको नेपाल–चीन जोड्ने प्रमुख ब्यापारिक नाका तातोपानीबाट झण्डै १ महिनापछि आवतजावत खुला भएको छ । तातोपानी नाकाबाट बुधबार बेलुकादेखि लिपिङ खोला पुलमा अस्थाई ट्रयाक खोली मालबाहक कन्टेनरहरु आवतजावत भएको नेपाल हिमालय सीमापार वाणिज्य संघले जनाएको छ ।
नेपाल हिमालय सीमापार वाणिज्य संघका महासचिव रामचन्द्र पराजुलीका अनुसार सिन्धुपाल्चोकको १० किलोबाट ढुङ्गा, गिट्टी र बालुवा लगेर लिपिङ खोलाको पहिरो पुरेर अस्थाई ट्रयाक बनाइएको छ । बाढीले खोलामा बनाएको गहिरा खोल्सामा ह्यूमपाइप राखिएको छ । यससँगै बाढी तथा पहिरोका कारण २७ दिन बन्द रहेको नाका सञ्चालनमा आएको हो ।
संघका अध्यक्ष रामहरि कार्कीका अनुसार उत्तरी नाकाको स्थलमार्ग सूचारु भएसँगै तिहारका लागि सामान मगाएका व्यवसायीहरुले अब चीनबाट सामान ल्याउन सक्ने भएका छन् । सँगै, दशैँका सामान बोकेर चीनबाट आउँदै गरेका मालबाहक सवारी पनि बाढी पहिरोका कारण बीच बाटोमै रोकिएका थिए । अब नाका सञ्चालनमा आएसँगै त्यसरी रोकिएका कन्टेनरहरु पनि आउन सक्ने भएका छन् ।
तर, सडकमा कति गाडी रोकिएका छन् भन्ने तथ्यांक भन्सार कार्यालयसँग छैन । तातोपानी भन्सार कार्यालयका भन्सार अधिकृत सूर्यप्रसाद काफ्लेका अनुसार खासाभन्दा माथि ७० देखि ८० वटा र खासाभन्दा तल १५ देखि २० वटा कन्टेनर रोकिएको अनुमान गरिएको छ ।
अब स्थलमार्ग सञ्चालनमा आएसँगै पहिलो चरणमा दशैँ अगाडी नै हिडेर बाटोमा रोकिएको मालबाहक सवारीलाई पार गराइने र त्यसपछि मात्रै अरु गाडीलाई पठाउने तयारी भन्सार कार्यालयले गरेको छ ।
तातोपानी नाका हुँदै चिनियाँ विद्युतीय सवारी, विद्युतीय उपकरण र फलफूल तथा लत्ताकपडा बढी आयात हुने गर्दछ । दशैँको मुखैमा बाढी तथा पहिरोले नाका अवरुद्द हुँदा नेपाली व्यवसायीहरुले ठूलो नोक्सानी ब्यहोर्नु परेको थियो ।
अहिले पनि तातोपानी नाकालाई अस्थाई रुपमा सञ्चालनमा ल्याइए पनि अझै जोखिम कायम रहेको व्यवसायीहरु बताउँछन् । कोदारी आसपासमा जुनसुकै बेला अवरुद्ध हुन सक्ने जोखिम कायम रहेकाले सरकारले स्थायी समाधान खोज्नुपर्ने व्यवसायीहरुको माग छ ।
