नेपाल उद्योग वाणिज्य महासंघको आसन्न निर्वाचनका लागि एउटा समूहले चैत ९ गते उम्मेदवारी घोषणा गर्ने भएको छ । हालका वरिष्ठ उपाध्यक्ष एवम् भावी अध्यक्ष अन्जन श्रेष्ठ समर्थित भनिएको टिमले सोमबार टिमकै उम्मेदवारी घोषणा गर्न लागेको हो ।
जस अनुसार एसोसियट उपाध्यक्षमा प्रबलजंग पाण्डे, वस्तुगत उपाध्यक्षमा शिव प्रसाद घिमिरे र जिल्ला नगर तर्फका दुइ उपाध्यक्षमा दिलसुन्दर श्रेष्ठ र कृष्ण प्रसाद शर्माको उम्मेदवारी घोषणा हुनेछ । पाण्डे हाल महासंघको केन्द्रीय सदस्य हुन् भने घिमिरे पनि केन्द्रीय सदस्य छन् । श्रेष्ठ महासंघ बागमती प्रदेशका अध्यक्ष हुन् भने शर्मा महासंघ लुम्बिनी प्रदेशका अध्यक्ष हुन् ।
वरिष्ठ उपाध्यक्षको घोषणा नहुने
स्रोतका अनुसार यो समूहले वरिष्ठ उपाध्यक्षको उम्मेदवारी भने अहिले घोषणा नगर्ने भएको छ । ४ जना उपाध्यक्षको मात्रै उम्मेदवारी घोषणा गर्ने र वरिष्ठ उपाध्यक्षको उम्मेदवारी पछि घोषणा गर्ने गरी तयारी अघि बढाइएको सो समूहबाट उम्मेदवार बन्न लागेका एक व्यक्तिले जानकारी दिएका छन् ।
‘हाम्रो ४ जना उपाध्यक्षका उम्मेदवारको उम्मेदवारी घोषणा हुन्छ’ ति व्यक्तिले भने, ‘वरिष्ठ उपाध्यक्ष र कोषाध्यक्षको चाहिँ पछि घोषणा हुन्छ । वरिष्ठ उपाध्यक्ष र कोषाध्यक्ष केन्द्रीय कार्यकारिणी समितिबाट चुनिने भएकाले अहिले घोषणा हुँदैन ।’
ति व्यक्तिका अनुसार यो समूहको वरिष्ठ उपाध्यक्षका उम्मेदवार हालका उपाध्यक्ष सुरकृष्ण वैद्य हुन् ।
यसअघि हेमराज ढकाललाई वरिष्ठ उपाध्यक्षको उम्मेदवारका रुपमा प्रस्ताव गर्दै अर्को समूहले प्यानल घोषणा गरिसकेको छ । उक्त समूहको एसोसिएयट उपाध्यक्षमा ज्योत्सना श्रेष्ठ, जिल्ला नगर उपाध्यक्षमा उमेश डालमिया र कल्पना गैरे तथा वस्तुगत उपाध्यक्षमा नरेश लाल श्रेष्ठ उम्मेदवार बन्ने भएका छन् । कमला श्रेष्ठलाई महिला उपाध्यक्षको उम्मेदवारको रुपमा अघि सारिएको छ ।
