नेपाल उद्योग वाणिज्य महासंघ बागमती प्रदेशको अधिवेशन र निर्वाचन फागुनमा हुने भएको छ । महासंघ बागमती प्रदेशको १३औँ कार्यकारिणी समितिको बैठकले फागुन १ गते प्रदेश अधिवेशन र फागुन २ गते निर्वाचन गर्ने निर्णय गरेको हो ।
महासंघ बागमती प्रदेशका अध्यक्ष दिलसुन्दर श्रेष्ठका अनुसार अध्यक्ष र विभिन्न पदका आकांक्षीबीच अहिले छलफल भइरहेको छ । यसपाली आफूले नेतृत्व हस्तान्तरण गर्ने भएकाले सर्वसम्मत रुपमा नेतृत्व चयन होस् भन्ने आफ्नो चाहना रहेको उनको भनाइ छ ।
को को छन् दाबेदार ?
बागमती प्रदेश मुलुकको राजधानी काठमाडौँसमेत भएको प्रदेश हो । यसकारण महासंघ पश्चात महासंघका अङ्गहरुमध्ये सबैभन्दा बढी देखिने र सुनिने संरचना पनि बागमती प्रदेश नै हो ।
यसपाली महासंघको बागमती प्रदेशको नेतृत्व लिनका लागि ४ जना व्यवसायीहरु आकांक्षी देखिएका छन् । दुर्गाराज श्रेष्ठ (वस्तुगत÷एसोसियट), सविन श्रेष्ठ (ललितपुर), गुणराज श्रेष्ठ (खैरहनी) र बेदबहादुर श्रेष्ठ (सिन्धुपाल्चोक) महासंघ बागमती प्रदेशको अध्यक्षका आकांक्षी हुन् ।
दुर्गाराज श्रेष्ठ हाल महासंघ बागमती प्रदेशको उपाध्यक्ष छन् । वस्तुगत–एसोसियट समूहबाट उनी उपाध्यक्षमा निर्वाचित भएका थिए ।
अर्का आकांक्षी गुणराज श्रेष्ठ पनि उपाध्यक्ष हुन् भने सविन श्रेष्ठ पूर्व उपाध्यक्ष हुन् ।
बेदबहादुर श्रेष्ठ भने सिन्धुपाल्चोक उद्योग वाणिज्य संघका पूर्व अध्यक्ष हुन् । महासंघ बागमती प्रदेशभित्र उनले मुख्य जिम्मेवारी लिएर काम गरेका छैनन् । तर, पौष ६ गते बाह्रबिसेमा सम्पन्न सिन्धुपाल्चोक उद्योग वाणिज्य संघको ३०औँ साधारणसभामा उनले महासंघ बागमती प्रदेशको अध्यक्षमा उम्मेदवारी नै घोषणा गरिसकेका छन् ।
दाबेदारहरुमध्ये केहीले महासंघका अध्यक्ष चन्द्र ढकाल र वरिष्ठ उपाध्यक्ष (हुनेवाला अध्यक्ष) अन्जन श्रेष्ठको समर्थन आफूलाई भएको बताउने गरेका छन् । तर, ढकाल र श्रेष्ठले अहिलेसम्म कोही कसैलाई पनि समर्थन गरेका छैनन् ।
सहमतिको प्रयास
महासंघ बागमती प्रदेशका अध्यक्ष दिलसुन्दर श्रेष्ठले आकांक्षीहरु आफू आफूबीच पनि अहिले सहमतिको कुराकानी चलिरहेको बताए । आफू अध्यक्षको भूमीकामा रहेको हुनाले सबै आकांक्षीबीच एकमत कायम रहोस् भन्ने चाहना रहेको बताउँदै उनले सहमतिका लागि अधिकतम् प्रयास रहने बताएका छन् ।
‘आकांक्षी साथीहरु सबै योग्य हुनुहुन्छ’ अध्यक्ष श्रेष्ठ भन्छन्, ‘अहिले निजी क्षेत्रभित्र प्रतिस्पर्धा भन्दा पनि एकमत र एकताको खाँचो छ । यस्तो बेलामा प्रतिस्पर्धामा जानुभन्दा मिलेर जानु राम्रो हुन्छ । साथीहरुले पक्कै पनि यो कुरा बुझ्नु भएकै छ ।’
अध्यक्षका दाबेदार दुर्गाराज श्रेष्ठले पनि अहिलेको समय सहमतिबाटै नेतृत्व चयन हुनुपर्ने समय भएको बताउँदै आफू सबै आकांक्षीहरुसँग छलफल र संवाद गर्न तयार रहेको बताएका छन् । यसका लागि अध्यक्षले समेत विशेष भूमीका खेल्नुपर्ने श्रेष्ठको भनाइ छ ।
निर्वाचन नै सर्न सक्ने
महासंघ बागमती प्रदेशले फागुन १ गते प्रदेश अधिवेशन र फागुन २ गते निर्वाचन गर्ने निर्णय गरेपनि यी दुबै कार्यक्रम सर्ने देखिन्छ । फागुन २१ गतेका लागि तोकिएको प्रतिनिधिसभा निर्वाचनका लागि निर्वाचन आयोगले माघ ४ गतेबाटै आचारसंहिता लागू गरेकाले महासंघ बागमती प्रदेशको अधिवेशन र निर्वाचन सर्न सक्ने देखिएको हो ।
