फिफा विश्वकप २०३४ को आयोजना साउदी अरेबियाले गर्ने तय भइसकेको छ । तर प्रतियोगिताको मिति २०३४ बाट २०३५ को शुरुवातमा सर्न सक्ने सम्भावना बढ्दै गएको छ ।
फिफा र साउदी आयोजकहरूले अहिले जटिल क्यालेन्डर समस्या समाधान गर्न गम्भीर छलफल गरिरहेका छन् । साउदी अरेबियामा जुन-जुलाई महिनामा तापक्रम ५० डिग्री सेल्सियससम्म पुग्ने भएकाले गर्मीयाममा विश्वकप आयोजना गर्न असम्भव छ । कतार २०२२ को जस्तै जाडोयाममा विश्वकपको विकल्प खोजिँदै छ ।
तर त्यस वर्षको जाडोयाम अर्थात् नोभेम्बर-डिसेम्बरमा रमजान महिना पर्ने भएकोले मुस्लिम पवित्र महिनाको सम्मानमा खेल तालिका मिलाउन कठिन देखिएको अन्तराष्ट्रिय संचारमाध्यमहरुले जनाएका छन्। हजको समय र सम्भावित विन्टर ओलम्पिक्स जस्ता कार्यक्रमले पनि मिति थप जटिल बनाएको छ ।
यी सबै कारणले गर्दा फिफा विश्वकपको सुरुवात २०३४ को क्रिसमसको आसपास वा ढिलो गरी २०३५ को जनवरी-फेब्रुअरीमा हुने सम्भावना रहेको छ । यसरी विश्वकप पहिलो पटक एउटा वर्षमा सुरु भएर अर्को वर्षमा समाप्त हुने ऐतिहासिक घटना हुन सक्छ । फिफाले अझै आधिकारिक घोषणा गरेको छैन तर स्रोतहरूका अनुसार यो विकल्पलाई गम्भीर रूपमा लिइएको छ ।
विश्वकप ढिलो सुरु हुँदा युरोपेली लिग, क्लब फुटबल र अन्य अन्तर्राष्ट्रिय प्रतियोगिताको क्यालेन्डरमा ठूलो प्रभाव पार्न सक्छ ।
