एलआरआर ग्रुपले ‘स्काइवेल’का गाडीको आफू पनि आधिकारिक बिक्रेता बनेको भन्दै उपभोक्तालाई झुक्याएको र कीर्ते गरेको पाइएको छ । केही समय अघि एलआरआर ग्रुपले स्काइवेलको गाडीको बिक्रेता दाबी गर्दै बुकिङको सूचना समेत प्रकाशित गरेको थियो । तर, स्काइवेलको प्रिन्सिपल कम्पनी नान्जिङ गोल्डेन ड्रागन बस कम्पनीले नेपालका लागि स्काइवेलको एक्सक्लुसिभ आधिकारिक बिक्रेता जी मोटर्स प्रा.लि. राधेराधे भक्तपुरमात्र रहेको जानकारी गराउँदै भन्सार विभाग र वाणिज्य विभागलाई पत्र पठाएको छ ।
कम्पनीका डेप्युटी जीएम (स्काइवेल एक्सपोर्ट डिभिजन) थोमसले पत्र पठाउँदै जी मोटर्स प्रा.लि. मात्रै स्काइवेलको एक्सक्लुसिभ आधिकारिक रहेको जनाएपछि एलआरआरले स्काइवेलका विद्युतीय एसयूभीको अवैध रुपमा बुकिङको प्रचार गरेको खुलेको हो ।
एलआरआरले वाणिज्य विभागमा एजेन्सी दर्ता गरेकै भरमा हङकङीस्थत एक कम्पनीसँग त्रिपक्षीय सम्झौता गरेर आफू पनि स्काईवेलको नेपालका लागि आधिकारिक बिक्रेता भएको दाबी गर्दै आएको थियो । कम्पनी नान्जिङ गोल्डेन ड्रागन बस कम्पनीले नेपालमा जी मोटर्समात्र आधिकारिक बिक्रेता भएको र हङकङ वा चीनका कम्पनीलाई अर्को देश वा क्षेत्रमा आधिकारिक बिक्रेता नियुक्त गर्ने अधिकार नरहेको जनाएको छ ।
नान्जिङ गोल्डेन ड्रागन बस कम्पनीले नेपालका लागि जारी गरेको प्रेस विज्ञप्ति
नेपालमा गाडी आयात गर्ने कम्पनीलाई उत्पादक कम्पनीले आधिकारिक बिक्रेता नियुक्त गरेको हुनुपर्छ । आधिकारिक बिक्रेता नियुक्त नभई गाडी आयात गर्न नपाइने प्रावधान छ ।
स्काइवेलको हकमा उत्पादक कम्पनीले जी मोटर्सलाई एक्सक्लुसिभ आधिकारिक बिक्रेता दिएकाले एलआरआरले नेपालमा स्काइवेलको कार आयात गर्न पाउँदैन । अब उत्पादक कम्पनीले नै वाणिज्य विभाग र भन्सार विभागलाई पत्र पठाएर आफ्नो नेपालमा आधिकारिक बिक्रेता जी मोटर्स मात्रै रहेको जनाएसँगै एलआरआरले कानुनी रुपमा नै अवैध तरिकाले गाडी ल्याएको पुष्टि भएको छ ।
यससँगै अब भन्सार विभागले एलआरआरले ल्याएका गाडी जफत गर्न सक्छ ।
यता जी मोटर्स प्रा.लि. ले भने स्काईवेलको प्रिन्सिपल कम्पनी नान्जिङ गोल्डेन ड्रागन बस कम्पनी लिमिटेडले नेपालको आधिकारिक बिक्रेता आफूलाई तोकेको र यसको जानकारी सम्बन्धित निकायलाई सम्बोधन गरेरै पत्रमार्फत पठाएसँगै आधिकारिक बिक्रेता दाबी गर्ने एलआरआरविरुद्द कानूनी उपचारमा जाने जनाएको छ ।
जी मोटर्सको विज्ञप्ति
