व्यवसायी शेखर गोल्छा पक्राउ परेका छन् । उनलाई प्रहरीको केन्द्रीय अनुसन्धान ब्यूरोले आज बिहीबार साँझ नक्साल क्षेत्रबाट प्रकाउ गरेको हो।
ब्यूरोका अनुसार हिमालयन रिइन्स्योरेन्स लिमिटेडका तत्कालिन अध्यक्ष रहेका गोल्छालाई “धितोपत्र सम्बन्धी ऐन, २०६३ “अन्तर्गतको कसूरमा पक्राउ गरिएको हो ।
नेपाल धितोपत्र बोर्डको प्रारम्भिक जाँचबुझ प्रतिवेदन समेतको आधारमा उनी पक्राउ परेको ब्यूरोले जनाएको छ। ब्यूरोका अनुसार शेखर गोल्छा समेतको मिलेमतोमा धितोपत्र सम्बन्धी ऐन, २०६३ को दफा ९४, ९५, ९६ को उपदफा (१) र दफा ९८ बमोजिम कसूरमा ऐ ऐनको दफा १०३ को उपदफा (३) बमोजिम थप अनुसन्धान तथा कारबाहीका लागि नेपाल धितोपत्र बोर्डको प्रारम्भिक जाँचबुझ प्रतिवेदन, २०८३ ब्यूरोमा प्राप्त भएपछि उनी पक्राउ परेका हुन् ।
उनलाई आज वैशाख १० गते काठमाडौं जिल्ला अदालत, बबरमहलबाट पक्राउ अनुमति लिई आज नै नक्सालबाट पक्राउ गरी थप अनुसन्धान भई रहेको ब्यूरोले जनाएको छ ।
अहिले सम्पत्ति सुद्धीकरण अनुसन्धान विभागले व्यवसायी दिपक भट्टलाई पक्राउ गरेरअनुसन्धान गरिरहेको छ । सो प्रकरणमा शेखर गोल्छा पनि जोडिएपछि प्रहरीले उनलाई पनि अनुसन्धानको लागि पक्राउ गरेको हो।
गोल्छाले आफुले प्रहरीलाई अनुसन्धानमा पूर्ण रुपले सघाउने र प्रहरीले बोलाएमा आफै उपस्थित हुने बताएका थिए।
