सरकारले सबै सरकारी कार्यालयमा अनिवार्य रुपमा विद्युतीय हाजिरी प्रणालीबाट कर्मचारीको हाजिर गराउने व्यवस्था गराउन निर्देशन दिएको छ। संघीय मामिला तथा सामान्य प्रशासन मन्त्रालयले आज सबै मन्त्रालय, कार्यालय, विभाग, निकाय र स्थानीय तहलाई यसबारे परिपत्र गरेको हो।
परिपत्रमा सबै कार्यालयहरुमा कार्यरत कर्मचारीहरुको उपस्थितिको अभिलेखिकरणका लागि विद्युतीय हाजिरी प्रणाली अनिवार्य कार्यान्वयन गर्न भनिएको छ। सो व्यवस्था कार्यान्वयन नभएको अवस्था भए कर्मचारीको दैनिक उपस्थिति ( आएको तथा गएको) विवरण अनिवार्य रुपमा विद्युतीय हाजिरी प्रणालीबाटै गर्ने व्यवस्था मिलाउनु हुन र प्रत्येक १५ दिनको हाजिरी विवरण प्रिन्ट गरी, प्रमाणित गरी सो अभिलेख कार्यालयमा सुरक्षित राख्न समेत मन्त्रालयले निर्देशन दिएको छ ।
मन्त्रालयको वैशाख ८ गतेको सचिवस्तर निर्णय अनुसार यस निर्देशन जारी गरिएको मन्त्रालयले जनाएको।
