अटोमोबाइल व्यवसायको कुम्भ मेला मानिने ‘नाडा अटो शो २०२४’ सफलतापूवर्क सम्पन्न भएको छ । भदौ ११ गतेदेखि १६ गते आइतबारसम्म भृकुटीमण्डपमा चलेको अटो शो आज सकिएको हो ।
यस पटकको अटो शोमा २३ वटा चार पाङ्ग्रे, १८ वटा मोटरसाइकल तथा स्कुटर (दुइ पाङ्ग्रे) र १४ वटा लाइट कमर्शियल गरी ५५ ब्राण्डले सहभागिता जनाएका थिए । २६ वटा अटो कम्पोनेन्ट कम्पनी, ७ वटा बैंक तथा वित्तीय संस्था र एउटा बीमा कम्पनीले पनि अटो शोमा सहभागीता जनाएको थियो ।
यसवर्ष अटो शोमा इलेक्ट्रिक भेहिकलको वर्चश्व रह्यो । कुल प्रदर्शनीमा रहेका चार पाङ्ग्रेमध्ये ८० प्रतिशतभन्दा बढी स्टल ईभीको थियो । अटो शोमा १९ लाखदेखि डेढ करोड बढी रुपैयाँ पर्ने गाडीहरु प्रदर्शनीमा राखिएको थियो ।
दुइ पाङ्ग्रेमा पनि इलेक्ट्रीक स्कुटर, स्पोर्टस् मोटरसाइकलसहित एड्भेन्चर बाइकसम्म प्रदर्शनीमा राखिएका थिए ।
अटो शोमा स्काईवेल, एमजी, सुजुकी, हुण्डाई, टाटा, किया, महिन्द्रा, बीवाइडी, ओमोडार, केई, लिप मोटर्स, रेडारा, आयोन, नेटा भी, जीकर, एक्सपेङ, अवतार, नामी, सेरेस, दिपल, हेनरी र बीएडब्लूले चार पाङ्ग्रे सवारी प्रदर्शनीमा राखेका थिए ।
दुइ पाङ्ग्रेतर्फ बजाज, यामाहा, रोयल इनफिल्ड, टीभीएस, हिरो, सुजुकी, बेनेली, भेस्पा, बीएमडब्ल्यू थिए । यस्तै, नयाँ मोडलमा सीएफ मोटो, गोगोरो, ग्यारो, जीओ, इलेक्ट्रीक वान, जोनसेन, ट्रायम्फ, एथर, एनआईयू, याडिया लगायतका ब्राण्ड पनि सहभागी थिए ।
लाइट कमर्शियलमा सेग्मेन्टमा केवाइसी, किङ्लङ, कामा, हाइगर, डोङफेङ, सीएचटीसी लगायतका ब्राण्ड सहभागी थिए ।
अटो शोमा विभिन्न कम्पनीका गरि कुल २ हजारभन्दा बढी गाडी बुकिङ भएका छन् । दुइ पाङ्ग्रेको पनि उल्लेख्य बुकिङ भएको छ । ६ दिनसम्म चलेको अटो शोमा झण्डै १ लाख अवलोकनकर्ताले सहभागीता जनाएको नाडाको भनाइ छ ।
