हुण्डाई गाडीको नेपालका लागि आधिकारिक आयातकर्ता तथा वितरक लक्ष्मी इन्टरकन्टिनेन्टलले वर्ष २०२४ को नाडा अटो शोमा ‘नयाँ हण्डाई क्रेटा’ प्रदर्शनीमा राखेको छ । नयाँ क्रेटामा विभिन्न विशेषताहरु थप भएका छन् भने यो गाडी निकै ‘स्टाइलिस’ पनि छ ।
नयाँ क्रेटाको अग्र भागमा प्यारामेट्रिक ब्ल्याक क्रोम ग्रिल, स्लीक क्वाड बीम, एलईडी हेड ल्याम्प र बम्पर राखिएको छ । बम्पर पनि नयाँ डिजाइनमा देख्न सकिन्छ । पछाडीको भागमा कनेक्टिङ एलईडी टेललाइट सेटअप र रि–डिजाइन गरिएको बम्पर राखिएको छ ।
गाडीको भित्री भागमा कालो र खैरो थिममा नयाँ ड्यासबोर्ड छ भने डिजिटल इन्स्ट्रुमेन्ट क्लस्टरलाई पहिलेको तुलनामा निकै आकर्षक गरि राखिएको छ ।
यसमा दुबै स्कुन समान १०.२५ इन्चका छन् । स्पीकर बोस साउण्ड सिस्टम, एम्बर एम्बियेन्ट लाइटिङ्ग, प्यानोरामिक सनरूफ, भेन्टिलेटेड सिटहरू र डुअल–जोन अटोमेटिक क्लाइमेट कन्ट्रोल जस्ता विशेषताले नयाँ क्रेटालाई भरिपूर्ण बनाएको छ । जसका कारण चालकले आरामदायी ड्राइभिङ अनुभव प्राप्त गर्नेछन् ।
यसमा ६ ओटा एयरब्याग, ३६० डिग्री क्यामेरा, सराउन्ड भ्यू मोनिटर, ब्लाइन्ड स्पट भ्यू मोनिटर, अटो होल्डसहितको इलेक्ट्रिक पार्किङ ब्रेक र टायर प्रेशर मोनिटरिङ सिस्टम छन्, जसले चालकलाई तुलनात्मक रुपमा थप सुरक्षित गराउँदछ भने चालकलाई आफू सुरक्षित छु भन्ने अनुभूति पनि गराउँछ ।
एडास फिचर अन्तर्गत लेन किप एण्ड फलोइङ असिस्ट, लेन डिपार्चर वार्निङ, एडाप्टभ क्रुज कन्ट्रोल, फ्रन्ट कोलिसन एभाइडेन्स, ब्लाइण्ड स्पट भ्यू मनिटर र ड्राइभर अटेन्सन वार्निङ जस्ता महत्वपूर्ण फिचरसहित आएको नयाँ क्रेटालाई १.५ लिटर पेट्रोल र १.५ लिटर डिजेल इन्जिनले थप शक्तिशाली बनाएको छ ।
गियर ट्रान्समिसनको विकल्पहरूमा एमटी, एटी र आइभीटी उपलब्ध छन् । राम्रो डिजाइन, हरेक भू–भागमा सहजै गुड्न सक्ने र हरेक उमेरसमूहका व्यक्तिलाई सुहाउने यो गाडी मिड साइज एसयूभी सेगमेन्टमा आएको हो ।
कम्पनीका अनुसार नयाँ हुण्डाई क्रेटा ई, ईपीएल, एस (ओ), एसएक्स, एस (ओ) सीभीटी, एसएक्स टेक, एसएक्स टेक सीभीटी र एसएक्स (ओ) सीभीटी भेरियन्टहरूमा उपलब्ध छ । यो गाडी विभिन्न ६ रङ्गहरूमा उपलब्ध रहेको कम्पनीले जनाएको छ ।
केही समय अगाडी नै नेपाली बजारमा भित्रिएको भएपनि हाल यसको अपग्रेड भर्सन अटो शोमा देख्न सकिन्छ । हुण्डाई क्रेटा धेरै बिक्री हुने एसयूभीमध्ये पर्दछ ।
नाडा अटो शोमा नयाँ हुण्डाई क्रेटाको बुकिङ उल्लेख्य मात्रामा भएको छ । कम्पनीले बुकिङ भएका गाडीहरुको तत्कालै डेलिभरी दिइने जनाएको छ । यसको प्रारम्भिक मूल्य ५५ लाख ९६ हजार छ ।
लक्ष्मी हुण्डाईले सन् २०१५ बाट नेपालमा क्रेटाको बिक्री सुरुवात गरेको थियो ।
