चालु आर्थिक वर्षको १० महिनाको अवधिमा झण्डै १० हजार युनिट विद्युतीय गाडी नेपाल भित्रिएका छन् । भन्सार विभागले सार्वजनिक गरेको तथ्यांक अनुसार चालु आर्थिक वर्ष २०८१/०८२ को १० महिना (साउनदेखि बैशाखसम्म)मा ९ हजार ८५० युनिट ईभी नेपाल भित्रिएका हुन् ।
भन्सारको तथ्यांक अनुसार यस अवधिमा ५० किलोवाट सम्मका ३ हजार ३६९ युनिट ईभी आयात हुँदा ५१ देखि १०० किलोवाट सम्मका ५ हजार ५३४ युनिट ईभी भित्रिएका छन् । यस्तै, १०१ देखि २०० किलोवाट सम्मका ९२७ युनिट, २०१ सय देखि ३०० किलोवाट सम्मका १८ युनिट र ३ सय किलोवाट माथि क्षमताका २ युनिट ईभी नेपाल भित्रिएको भन्सारको तथ्यांक छ ।
यस अवधिमा भित्रिएका कुल ९ हजार ८५० युनिट ईभीको मूल्य २३ अर्ब ९ करोड ९३ लाख २२ हजार बराबर रहेको भन्सारको तथ्यांकमा उल्लेख गरिएको छ । यी गाडी आयात हुँदा सरकारले १४ अर्ब २४ करोड ७९ लाख ७९ हजार रुपैयाँ राजस्व प्राप्त गरेको छ ।
