नेपालमै एसेम्बल भएका गाडीको संख्या ५ सय नाघेको छ । बिजनेश पानासँगको कुराकानीमा लक्ष्मी इन्टरकन्टिनेन्टलका महाप्रबन्धक दीपक थपलियाले केही दिन अगाडी नेपालमै एसेम्बल भएको हुण्डाईको भेन्यू ५ सय बढी युनिट बिक्री भइसकेको जनाएका थिए । यस्तै, गत महिनाबाट मात्रै नेपालमै एसेम्बल भएर बजारमा आएको क्रेटा पनि ९० युनिट जति उपभोक्तालाई हस्तान्तरण गरिसकिएको उनको भनाइ थियो ।
आज आइतबार भन्सार विभागको तथ्यांकले पनि उक्त भनाइ पुष्टि गरेको छ । भन्सार विभागको तथ्यांकअनुसार चालू आर्थिक वर्ष २०८१/०८२ को ९ महिनामै ४ सय गाडी नेपालमै एसेम्बलका लागि भित्रिएका छन् । आर्थिक वर्ष २०८०/०८१ मा यस्ता अनएसेम्बल्ड गाडी २१० युनिट नेपाल भित्रिएका थिए । आर्थिक वर्ष २०७९/८० मा भने जम्मा ४ युनिट मात्रै ल्याइएको थियो ।
हुन्डाईले सुरुमा भेन्यू एसयूभीबाट नेपालमै एसेम्बल थालेको थियो । गत महिनाबाट लक्ष्मी ग्रुपले हुण्डाइको सर्वाधिक सफल मोडल क्रेटाको पनि आईसी प्लेटफर्मको नेपालमै एसेम्बल सुरु गरेको छ । महाप्रबन्धक थपलियाका अनुसार अब आई१० पनि एसेम्बल गर्ने तयारी भइरहेको छ ।
उनका अनुसार सहुलियत पाएको खण्डमा लक्ष्मी ग्रुपले ईभीको पनि एसेम्बल गर्न सक्ने क्षमता राख्छ । लक्ष्मी इन्टरकन्टिनेन्टलले एसेम्बल सपका १४ मध्ये २ वटा स्टेशन ईभीका लागि राखेको छ ।
सरकारले नेपालमै एसेम्बल गर्ने गाडीको अन्तःशुल्कमा ५० प्रतिशतसम्म छुट दिएपछि लक्ष्मी ग्रुपले नेपालमै हुण्डाईका भेन्यू र क्रेटाको एसेम्बल गर्दै आएको छ । अहिले नेपालमै बनेको क्रेटाको माग उच्च रहेको छ । आयात गरेर ल्याइएको भन्दा नेपालमै एसेम्बल गरिएको क्रेटाको मूल्य ४ लाखदेखि ९ लाखसम्म सस्तो छ ।
