प्रधानमन्त्री केपी शर्मा ओलिको प्रमुख आतिथ्यतामा सुरु भएको पाँचौं राष्ट्रिय श्रम तथा रोजगार सम्मेलनको अवसरमा नाडा अटोमोबाइल्स एसोसियशन अफ नेपाल र श्रम मन्त्रालय अन्तर्गतको राष्ट्रिय व्यावसायिक प्रशिक्षण प्रतिष्ठानबीच समझदारी पत्रमा हस्ताक्षर भएको छ ।
प्रतिष्ठान र नाडाबीच लागत साझेदारीमा अटोमोवाइल क्षेत्रमा रोजगारमूलक छोटो अवधिको तालिम विकास, सञ्चालन र प्रशिक्षार्थीहरुलाई रोजगारीको सुनिश्चितता गर्ने विषयमा समझदारी भएको हो । सो समझदारी पत्रमा नाडाका तर्फबाट अध्यक्ष करण चौधरीले हस्ताक्षर गरेका छन् ।
यसले रोजगारी र श्रमिकहरुको क्षमता विकासका लागि सरकार र नेपालको नीजि क्षेत्र समन्वयात्मक रुपमा अघि बढ्ने अपेक्षा गरिएको छ । यसलाई नाडाले सरकारको हरेक कदममा नीजि क्षेत्रलाई समेत सहभागी गराई अघि बढने संकल्पको रुपमा लिएको नाडाका महासचिव सुरेन्द्र उप्रेतीले बताएका छन् ।
नाडा सो सम्मेलनको वित्तिय सहयोगी भई सो सम्मेलनको आयोजक मध्येको एक संस्था समेत भएको छ । नाडा आफ्नो इतिहासमा पहिलो पटक यस्तो सम्मेलनमा सहभागी भएको हो ।
सम्मेलनमा नाडाका अध्यक्ष चौधरीले नेपालमा रोजगरीको स्थिति, स्वदेशभित्र मात्रै नेपालबाट विदेशमा समेत भइरहेको बसाइँसराईले पारेका प्रभावहरु, नेपाली विद्यार्थीहरुले अन्य मुलुकहरुमा जानका लागि गरिरहेको प्रयास र त्यसबाट देशमा परेको प्रभाव, रोजगारीका चुनौतीहरु, नेपालको अटोमोवाइल क्षेत्रले राजश्व मार्फत देशको अर्थतन्त्रमा दिएको योगदान, अटोमोवाइल क्षेत्रले दिने रोजगारीमा देखिएका चुनौतीहरु, नीतिगत सिफारिस र तत्कालै गर्नुपर्ने पहलहरुका विषयमा प्रस्तुति समेत दिएका थिए ।
उक्त सम्मेलनमा नाडाका तर्फबाट उपाध्यक्ष राजनबाबु श्रेष्ठ, महासचिव सुरेन्द्रकुमार उपे्रती, केन्द्रिय कार्य समिति आमन्त्रीत सदस्य नारायणप्रसाद पौडेल समेतको उपस्थिति रहेको थियो ।
उक्त सम्मेलन फागुन २७ गतेसम्म चल्नेछ ।
