पूर्वप्रधानमन्त्री केपी शर्मा ओलीले संसदमा प्रस्तुत भएको आगामी आर्थिक वर्षको बजेटका विषयमा आफूले प्रधानमन्त्री पुष्पकमल दाहाल प्रचण्डसँग छलफल गरिरहेको बताएका छन् ।
नेकपा एमाले उद्योग व्यवसाय विशेष जिल्ला कमिटीको दोस्रो अधिवेशनको उद्घाटन गर्दै नेकपा एमालेका अध्यक्ष समेत रहेका पूर्वप्रधानमन्त्री ओलीले संसदमा प्रस्तुत भएको बजेटमा छुटेका र अपुग देखिएका विषयहरू कसरी समेटेर लैजाने भन्ने विषयमा आफू प्रधानमन्त्री प्रचण्डसँग गम्भीर छलफलमा रहेको बताएका हुन् ।
उनलेे बजेटमा सुधार गर्नुपर्ने विषयसहित यो बजेटको प्रभावकारी कार्यान्वयनका सन्दर्भमा प्रधानमन्त्री प्रचण्डसँग आफू छलफल गरिरहेको जानकारी गराए । बजेट निर्माणका क्रममा पर्याप्त छलफल हुन नसक्दा सुधार गरेर जान सकिने र सुधार गरेर निजी क्षेत्रलाई थप विश्वस्त बनाउन सकिने ठाउँ हुँदाहुँदै पनि खास सम्बोधन हुन नसकेको उनको टिप्पणी छ ।
“छुटेका विषय कसरी समावेश गर्ने भन्ने बारेमा म प्रधानमन्त्री ज्यूसँगै छलफलमा छु, समय अझै बाँकी रहेकाले बजेटको प्रभावकारीता र कार्यान्वयनलाई नै प्रभावकारी कसरी बनाएर जान सकिन्छ भन्ने सन्दर्भमा हामीले छलफल गरिरहेका छौँ, छुटेका विषय सम्बोधन गरेर जान्छौं” पूर्वप्रधानमन्त्री ओलीले भने ।
