नेपाल राष्ट्र बैंकले पोखरा फाइनान्स र समृद्धि फाइनान्सलाई मर्जरको लागि अन्तिम स्वीकृति प्रदान गरेको छ । राष्ट्र बैंकले वैशाख २९ गते मर्जरको लागि अन्तिम स्वीकृति प्रदान गरेको हो।
दुवै कम्पनीको साधारणसभाले मर्जर प्रस्ताव पारित गरेर स्वीकृतिको लागि राष्ट्र बैंकमा पेश गरेका थिए। सोहि अनुसार राष्ट्र बैंकले अन्तिम स्वीकृति दिएको हो। राष्ट्र बैंकले अन्तिम स्वीकृति दिएसंगै अब एकिकृत कारोबारको बाटो खुल्ने छ।
दुवै संस्था समान हैसियतमा मर्जरमा जाने भएका हुन्। संयुक्त मर्जर समितिले १:१ शेयर आदान प्रदान अनुपात निर्धारण गरेकोमा दुवै कम्पनीको साधारणसभाले सो स्वापलाई पारित गरेका थिए।
यी दुई संस्थाबीच मर्जरको लागि गत साउन ४ गते प्रारम्भिक सम्झौता भएको थियो। राष्ट्र बैंकले असोज २७ गते दुई संस्थालाई मर्जरमा जान सैद्धान्तिक सहमति प्रदान गरेको थियो।
प्रारम्भिक सम्झौता अनुसार मर्जरपछि बन्ने कम्पनीको नाम पोखरा फाइनान्स नै रहने छ । मर्जर पछि केन्द्रीय कार्यालय पोखरा मै रहने छ भने कर्पोरेट कार्यालय काठमाडौँमा रहने छ। हाल समृद्धि फाइनान्सका अध्यक्ष मर्जर पछि बन्ने कम्पनीको अध्यक्ष रहने छन् ।
