जेनजी प्रदर्शनको क्रममा राष्ट्रिय वाणिज्य बैंकको एउटा शाखाबाट १८ किलो सुन र ५ कराेड नगद लुटिएको खुलासा भएको छ । नेपाल राष्ट्र बैंकका गभर्नर विश्वनाथ पौडेलले सुशान्त प्रधानसँगको पोडकाष्टमा यो खुलासा गरेका हुन् ।
उनका अनुसार संसद भवन परिसरमै रहेको राष्ट्रिय वाणिज्य बैंकको नयाँ बानेश्वर शाखाबाट ५ करोड १५ लाख रुपैयाँ र १८ किलो सुन लुटिएको हो । बैंकका अनुसार सो सुन ऋण धितोमा रहेको सुन थियो, त्यसको बीमा पनि गरिएको छ । ग्राहकको लकरमा रहेको सबै सुन सुरक्षित रहेको बैंकले जनाएको छ ।
गर्भनरका अनुसार देशभर रहेका बैंक तथा वित्तीय संस्थाका ६८ वटा शाखा र एक्सटेन्सन काउन्टर, ६९ वटा एटीएममा तोडफोड तथा आगजनी भएको छ । यसबारे बैंकको सिसिटिभी हेरेर अनुसन्धान भइरहेको बताईएको छ।
