आज २०८१ साउन १ गतेदेखि नेपाल क्लियरिङ्ग हाउस लिमिटेडले सञ्चालन गर्ने सेवाहरुको कारोबार शुल्कमा मूल्य अभिवृद्धि कर (भ्याट) लाग्ने भएको छ। नेपाल सरकारको आर्थिक वर्ष २०८१/८२ बजेटले गरेको व्यवस्था बमोजिम नयाँ आर्थिक वर्ष सुरु भएसँगै नेपाल क्लियरिङ्ग हाउसले सञ्चालन गर्ने सेवाहरुको कारोबार शुल्कमा भ्याट लाग्ने भएको हो।
नेपाल सरकारको अर्थ सम्बन्धी प्रस्तावलाई कार्यान्वयन गर्न बनेको विधेयक (आर्थिक ऐन, २०८१) अनुसार नेपाल क्लियरिङ्ग हाउसले प्रदान गर्दै आएको समासोधन गृह (क्लियरिङ्ग) सेवालाई मूल्य अभिवृद्धि कर छुट सूचीबाट हटाइएको छ । सोहि कारण आज २०८१ श्रावण १ गते देखी लागु हुनेगरी क्लियरिङ्ग हाउसबाट सञ्चालनमा रहेका सम्पूर्ण सेवाहरुमा मूल्य अभिवृद्धि कर लागू भएको हो ।
यस व्यवस्था सम्बन्धी थप जानकारीको लागी आफ्ना सम्बन्धित बैंक वित्तीय संस्थाहरुमा सम्पर्क गर्न क्लियरिङ्ग हाउसले आग्रह गरेको छ ।
