स्काईवेलका विद्युतीय गाडी नेपाली बजारमा प्रवेश गरेको भर्खरभर्खरै हो । केही महिना अगाडी मात्रै जी मोटर्सले स्काईवेललाई नेपाल भित्र्याएको हो । ३ महिनाकै अवधिमा ४० बढी गाडी डेलिभरी गरिसकेको जी मोटर्सले ‘नाडा अटो शो २०२४’मा धमाका मच्चाएको छ ।
५औँ दिनसम्ममा ९९ वटा स्काईवेल गाडी बुकिङ भएकोमा अन्तिम दिन आइतबार मात्रै २७ वटा बुकिङ थपिएका छन् । स्काईवेल गाडीको आधिकारिक वितरक जी मोटर्स प्रा.लि.का अनुसार नाडा अटो शो अवधिभरी १२६ वटा स्काईवेल ईभी ब्राण्ड बुकिङ भएका छन् ।
कम्पनीले ईटी ५, बीई ११ मोडलका गाडीहरु प्रदर्शनीमा राखेको थियो । बीई ११ मोडेलका गाडीले क्रमशः ६२० किलोमिटर, ५२० किलोमिटर र ४२० किलोमिटर रेन्ज दिने जनाइएको छ ।
कम्पनीका कार्यकारी निर्देशक पारश मणी गेलालका अनुसार हाल नेपालमा ४० वटा भन्दा बढी स्काईवेलका ईटी–५ प्रीमियम इलेक्ट्रिक एसयुभि बिक्री भईसकेका छन् ।
जी मोटर्सले नाडामा बुकिङ्ग गर्ने ग्राहकका लागी ४१० किलोमिटर रेन्ज भएको बीई ११ को मूल्य ७५ लाख ९० हजार, ५२० किलोमिटर रेन्ज दिने बीई११ को अर्को मोडलको मूल्य ८५ लाख ९० हजार र ईटी५ को मूल्य १ करोड १० लाख रुपैयाँ कायम गरेको थियो ।
नाडा शो पश्चात सबै मोडेलका गाडीमा ५ लाखको दरले मूल्य वृद्धि हुने जी मोटर्सले जनाएको छ ।
स्काईवेल ६५ भन्दा बढी देशहरु जर्मनी, युके, अस्ट्रेलिया, ल्याटिन अमेरिका, टर्कि, इजरायल, पोल्यान्डमा बिक्री हुँदै नेपालमा भित्रिएको हो । स्काईवेल युरोपियन स्ट्याण्डर्डका सवारी बिक्री गर्ने प्रीमियम सवारी उत्पादक कम्पनी हो ।
