भृकुटीमण्डपमा जारी नाडा अटो शो २०२४ मा टाटाको पन्च ईभीमा अवलोकनकर्ताको भीडभाड हुने गरेको छ । नेपालका लागि आधिकारिक बिक्रेता सिप्रदी ट्रेडिङका अनुसार कम्पनीले प्रदर्शनीमा राखेको पन्च ईभीको हालसम्म ३ सय बढी बुकिङ भइसकेको छ ।
अटो शोको पहिलो दिन नै १ सय युनिट बुकिङ भएकोमा हालसम्म बुकिङ संख्या ३ सय नाघिसकेको कम्पनीले जनाएको छ । सस्तो मूल्यको एसयुभी ईभी भएकाले यसको बुकिङ निकै भइरहेको बताइन्छ ।
सिप्रदीका अनुसार नेपाली बजारमा पन्च ईभी तीन भेरियन्टमा उपलब्ध छ । पन्च ईभी इमपावर्ड प्लस एस एमआर ३३ लाख ९९ हजार, पन्च ईभी इमपावर्ड एलआरको मूल्य ३६ लाख ९९ हजार र पन्च ईभी इमपावर्ड प्लस एसएलआर ३८ लाख ९९ हजार पर्नेछ ।
प्योर इभी प्ल्याटफर्ममा बनेको पन्च इभी अत्याधुनिक प्रविधियुक्त रहेको कम्पनीको दाबी छ । यसमा १६ इन्च एलआरआर टायर, १९० मिमी ग्राउन्ड क्लियरेन्स, ९० डिग्रीको कोणमा खुल्ने ढोका, ३६६ लिटरको बूट स्पेस लगायतका विशेषताले भरिपूर्ण यो गाडी नेपालमा लोकप्रीय बन्नेमा कम्पनी विश्वस्त देखिएको छ ।
भारतमा टाटा पन्च ईभी मासिक रुपमा १८ हजार युनिटभन्दा बढी बिक्री भइरहेको छ ।
