नेपाल उद्योग वाणिज्य महासंघका अध्यक्ष चन्द्रप्रसाद ढकालले अटोमोबाइल्सबारे सरकारी नीति ठिक नभएको बताएका छन् । उनले अटोमोबाइल्स क्षेत्रलाई विलासीको साधनका रुपमा राख्ने गरिएको भन्दै यसलाई परिवर्तन गरेर आवश्यकताको साधनमा वर्गीकरण गर्नुपर्ने बताएका हुन् ।
मंगलबारबाट काठमाडौँमा सुरु भएको नाडा अटो शो २०२४ को उद्घाटनमा बोल्दै अध्यक्ष ढकालले सवारी साधनलाई विलासी भन्ने सोच पुरातनवादी चिन्तन भएको बताउँदै अब पूरानो सोचलाई फेर्नुपर्ने बताए ।
‘नीति बनाउनेहरुको सोचमा अटोमोबाइल भनेको लक्जरी भन्ने छ, यो पुरातन सोच हो’ अध्यक्ष ढकालले भने, ‘यो सोचलाई फेर्नु पर्छ, अटोमोबाइल क्षेत्र अब आवश्यकताको क्षेत्र हो ।’
उनले बैंक तथा वित्तीय संस्थाले गाडी खरिदकर्तालाई फाइनान्सिङ सुविधा उपलब्ध गराउँदा सरकारकै नीतिका कारण लक्जरी साधनका रुपमा वर्गीकरण हुँदा महँगो पर्ने गरेको भन्दै यसलाई परिवर्तन गर्नुपर्ने पनि बताएका छन् ।
