बीवाईडी गाडीको नेपालका लागि आधिकारिक वितरक साइमेक्स इंकले बीवाईडीको एट्टो ३ को नयाँ संस्करण सार्वजनिक गरेको छ । बीवाईडीको आधिकारिक वितरक साइमेक्स इङ्कले बीवाईडी एट्टो ३ को नयाँ भेरियन्ट सार्वजनिक गरेको हो ।
नयाँ संस्करणलाई कम्पनीले स्पोर्टी इलेक्ट्रिक एसयूभी भनेको छ । कम्पनीले यो गाडी सबैभन्दा बढी बिक्री हुने विश्वास लिएको छ ।
नेपाल भित्रिएको दुई वर्ष पनि नपुग्दै ३ हजार युनिटभन्दा बढी बीवाईडी एट्टो ३ बिक्री भइसकेको कम्पनीले जनाएको छ । बीवाईडी एट्टो ३ को २०२४ संस्करण विशेषरूपमा अपग्रेड गरिएको र यसमा नयाँ फिचर थप गरिएको कम्पनीले जनाएको छ ।
गाडी आकर्षक कसमस ब्ल्याक कलर अप्सनमा समेत उपलब्ध छ । इन्टेरियरमा युनिक ब्ल्याक र ब्लू कलर स्किम पनि उपलब्ध छ । गाडीको एक्सटेरियरमा रियर ब्याज अर्थात् पछिल्लो भागमा पहिले ‘बिल्ड योर ड्रिम’ ब्याज रहेकामा अब भने स्लिक खालको ‘बीवाईडी’ मात्र राखिएको छ ।
डी–पिलर पहिले ड्रागन स्केल जस्तै प्याटर्नसहित सिल्भर कलरमा रहेकामा अब भने स्टाइलिस ब्ल्याक कलरमा राखिएको बताइएको छ ।
बीवाईडी एट्टो ३ को इन्फोटेनमेन्ट सिस्टम पहिले १२.८ इन्च रहेकोमा अहिले १५.६ इन्चको उपलब्ध भएको छ ।
सुपेरियर ग्रिप र सबै टेरेन्समा राम्रो ह्यान्डलिङ प्रदान गर्न गाडीको दुवै भेरिएन्टमा हाई–पर्फमेन्स कन्टिनेन्टल टायर रहेको बीवाईडीले जनाएको छ ।
नयाँ संस्करणको गाडी बीवाईडी एपसँग जोडिएको छ । यसबाट गाडीको रेन्ज र पावर लेभल चेक गर्न, टायर प्रेसर चेक गर्न र गाडीका ढोका तथा झ्याल बन्द भएको वा नभएको थाहा पाउन सकिन्छ ।
टाढैबाट गाडीको अवस्थिति पत्ता लगाउन, एसी सञ्चालन गर्न र गाडीको हर्न तथा लाइट नियन्त्रण गर्नसमेत सकिने जनाइएको छ ।
