भदौ ११ देखि १६ गतेसम्म चल्ने ‘नाडा अटो शो २०२४’मा लञ्च हुने गरि विभिन्न मोडल तथा ब्राण्ड भित्रिदैँछन् । गाडी आयातकर्ता कम्पनीहरुले नाडा अटो शो लक्षित गर्दै नयाँ मोडल भित्र्याउँदैछन् । जसका लागि उनीहरुले अटो शोमा आफ्नो स्टल सुरक्षित गरिसकेका छन् ।
अटो शोमा चार पाङ्ग्रे ब्राण्डका २४ कम्पनी सहभागी हुँदैछन् । जसमध्ये अधिकांशले नयाँ मोडल तथा ब्राण्ड ल्याउँदैछन् । अटो शो मार्फत नै उनीहरुले नयाँ मोडल तथा ब्राण्ड सार्वजनिक गर्दैछन् । कतिपयले बुकिङ खुलाइसकेका छन् ।
नाडा अटो शोमा आएर बुकिङ गर्नेहरुलाई कम्पनीहरुले विभिन्न छुट तथा उपहार योजना पनि ल्याउँछन् । अहिले कम्पनीहरुको यसैको तयारीमा जुटिरहेका छन् । यसपालीको अटो शोमा ८० प्रतिशतभन्दा बढी स्टल विद्युतीय सवारी साधनले ओगट्ने छन् ।
हाल नेपाली अटोमोबाइल्स बजारमा विद्युतीय सवारी साधनको बिक्रीमार्फत क्रान्ति गरिरहेका बीवाईडी (साइमेक्स इंक), टाटा (सिप्रदी), नेटा (सीजी मोटर्स) लगायतले अटो शोमा नयाँ मोडल तथा नयाँ ब्राण्ड ल्याउने तयारी गरिरहेका छन् ।
जी मोटर्सको ‘स्काइवेल बीई११’
नेपालमा निकै प्रतिक्षा गरिएको स्काइवेलको ‘बीई११’ मोडल जी मोटर्सले नाडा अटो शोमा लञ्च गर्दैछ । स्काइवेलको नेपालका लागि एकमात्र आधिकारिक बिक्रेता जी मोटर्सले ४१० किलोमिटर रेञ्ज र ५२० किलोमिटर रेञ्ज दिने दुइ भेरियन्टका ‘बीई११’ ईभी सार्वजनिक गर्न लागेको हो ।
४१० किलोमिटर रेन्ज दिने बीई११ मोडलमा ५८ किलोवाट आवरको ब्याट्री हुनेछ भने ५२० किलोमिटर रेञ्ज दिने बीई११ को अर्को भेरियन्टमा ७१ किलोवाट आवरको ब्याट्री जडित छ ।
बीवाईडीको नयाँ मोडल आउँदै
अहिले बिवाईडीको डल्फिन तथा एट्टो–३ मार्फत विद्युतीय सवारी साधनको बजारमा आक्रामक रुपमा प्रस्तुत भइरहेको साइमेक्स इंकले अटो शोलाई लक्षित गरी नयाँ मोडल ल्याउँदैछ ।
साइमेक्स इंकले बीवाईडीकै नयाँ मोडल सार्वजनिक गर्ने भनेपनि गाडीको नाम अरु जानकारी सार्वजनिक गरिसकेको छैन ।
लक्ष्मीको ‘केई’
लक्ष्मी ई मोबिलिटीले नाडा अटो शोमा ‘केई’ का ३ वटा नयाँ मोडेल सार्वजनिक गर्ने भएको छ । नेपालका लागि केई अटोमोबाइल्सको आधिकारिक विक्रेता लक्ष्मी ई मोबिलिटीले नाडा अटो शोमा ३ मोडलका गाडीहरु सार्वजनिक गर्ने भएको हो ।
नाडामा सार्वजनिक हुने तीन मोडेलको सही नाम बताउने व्यक्तिलाई पुरस्कार दिने घोषणा कम्पनीले गरेको छ । यसका लागि कम्पनीले केई नेपालको आधिकारिक फेसबुक तथा इन्स्टाग्राम पेजमार्फत क्याम्पेन सुरु गरेको छ ।
सहभागी मध्यबाट सबै तीन मोडेलका गाडीको सही पहिचान गरी उत्तर दिने एक जना भाग्यशाली विजेताले जर्मन प्रतिष्ठित ब्राण्ड बोसको मिक्सर ग्राइन्डर प्राप्त गर्नेछन् । यो क्याम्पेन ४ भदौदेखि सुरु भएर १० भदौमा सकिने छ ।
नाडा अटो शोको स्टल नम्बर एच–१६ मा केई ब्रान्डका गाडीहरू प्रदर्शनीमा राखिने छ ।
टाटाको ‘पञ्च.ईभी’
यस वर्षको नाडा अटो शोको मुख्य प्रायोजक टाडा डट ईभी हो । टाटा मोटर्सले अटो शोमा नयाँ विद्युतीय गाडी पञ्च डट ईभी सार्वजनिक गर्ने भएको छ । ३५ किलोवाट आवरको ब्याट्री र ९० किलोवाट क्षमताको मोटर रहेको पञ्च डट ईभी दुई भेरियन्टमा उपलब्ध हुने भएको छ ।
टाटाको आधिकारिक वितरक सिप्रदी ट्रेडिङका अनुसार यो नयाँ ईभीले एक पटकको फूल चार्जमा ४२१ किलोमिटर रेञ्ज दिने बताइएको छ । गाडी मूल्य अटो शो मा सार्वजनिक हुनेछ भने कम्पनीले प्रि–बुकिङ खुला गरिसकेको छ ।
पारामाउन्टको ‘एमजी साइबर स्टर’
एमजीका गाडीको नेपालका लागि आधिकारिक बिक्रेता पारामाउन्ट मोटर्सले एमजीको नयाँ ईभी मोडल सार्वजनिक गर्ने तयारी गरेको छ । इलेक्ट्रिक स्पोर्टकार ‘साइबर स्टर’लाई नेपाल ल्याउन लागिएको जनाइएको छ ।
कम्पनीले नाडा अटो शोमा यो गाडीको मूल्यसहित सम्पूर्ण विवरण सार्वजनिक गर्ने गरि अहिले यसैको तयारी अघि बढाइरहेको छ ।
सीजीका ३ मोडल आउँदै
सीजी मोटर्सले नाडा अटो शोमा आफ्ना ३ मोडल तथा ब्राण्ड सार्वजनिक गर्दैछ । अटो शोकै अवसरमा सीजीले बुहप्रतिक्षित ईभी ब्रान्ड अवतार सार्वजनिक गर्ने भएको छ । चिनियाँ अटो निर्माता चांगन, ईभी ब्याट्री निर्माता सीएटीएल र प्रविधि कम्पनी हुवावेको संयुक्त उत्पादन अवतारलाई सीजीले नेपालमा ल्याइसकेको छ ।
९० किलोवाट आवरको ब्याट्री क्षमतासहित आउने यो प्रिमियम ईभी अवतारमा २३० किलोवाट क्षमताको छ । गाडीको मूल्य १करोड ४५ लाख रुपैयाँ तोकिएको छ ।
सीजी अटो शोमै नयाँ मिडसाइज पिकअप रिड्डारा सार्वजनिक गर्दै छ । यसमा २०० किलोवाट आवरको मोटर क्षमता छ भने ६३ किलोवाट आवर क्षमताको ब्याट्री छ । एक पटकको चार्जमा यसले ३८३ किलोमिटर रेञ्ज दिने बताइएको छ ।
सीजी मोटर्सले अटो शो कै अवसरमा नेटा ईभीको नयाँ मोडल ‘नेटा एक्स’ पनिसार्वजनिक गर्ने भएको छ । ५२ किलोवाट आवर र ६२ किलोवाट आवरका २ ब्याट्री भेरियन्टमा उपलब्ध हुने यो गाडीको मोटर पावर १०० किलोवाट छ । नेटा एक्सका दुई भेरियन्टको मूल्य ५३ लाख र ६३ लाख रुपैयाँ तोकिएको छ ।
एमएडब्ल्यूको ‘दिपल एल–०७’ र ‘नामी बक्स’
एमएडब्ल्यूले चिनियाँ उत्पादक चांगनको दिपल ब्राण्डको नयाँ मोडल ‘दिपल एल–०७’ सार्वजनिक गर्दैछ । प्रिमियम अटो ब्राण्ड दिपल एल–०७ को मूल्य ६९ लाख ९९ हजार रुपैयाँ छ ।
यसमा ६२६.८ किलोवाट आवरको ब्याट्री छ भने ९९ किलोवाट आवरको मोटर क्षमता छ । गाडीले एक पटकको चार्जमा ५३० किलोमिटर रेञ्ज दिने बताइएको छ ।
एमएडब्ल्यूले अर्को ब्राण्ड डङफेङको ‘नामी बक्स ईभी’ पनि सार्वजनिक गर्दैछ ।
सांग्रिला मोटर्सको ‘लिपमोटर सी–१०’
सांग्रिला मोटर्सले नयाँ ईभी ब्राण्ड ‘लिपमोटर’ नाडा अटो शोकै अवसरमा नेपाल ल्याउँदैछ । सांग्रिला मोटर्सले लिपमोटरको सी–१० मोडल नेपाल ल्याउन लागेको हो ।
पायोनियर मोटोकर्पको ‘जिकर’का दुई मोडल
पायोनियर मोटोकर्पले नेपालमा नयाँ ईभी ब्राण्ड जिकर ल्याइसकेको छ । नाडा अटो शो २०२४ मा पायोनियर मोटोकर्पले जिकर एक्सका दुइ भेरियन्ट सार्वजनिक गर्नेछ ।
कम्पनीले डुअल–मोटर अल–ह्विल ड्राइभ (एडब्ल्यूडी) र सिंगल–मोटर रियर–ह्विल ड्राइभ (आरडब्ल्यूडी) सार्वजनिक गरिने जनाएको छ । ६६ किलोवाट आवरको ब्याट्री रहेको गाडीले एक पटकको चार्जमा ४४० किलोमिटर रेञ्ज दिने बताइएको छ ।
