नाडा अटोमोबाइल्स एशोसियशन अफ नेपालका अध्यक्ष करण चौधरीले अहिले अटोमोबाइल्स क्षेत्र निकै समस्यामा रहेको जनाएका छन् । बजारमा दुइ पाङ्ग्रे सवारीको बिक्रीको दरलाई हेर्ने हो भने युवा पलायनको ठूलो असर अटोमोबाइल्स क्षेत्र र त्यसमा पनि दुइ पाङ्ग्रेको व्यवसायमा परिरहेको उनको भनाइ छ ।
‘दुइ पाङ्ग्रे सवारी साधनको बिक्री अत्यन्त कमजोर छ, युवा जनशक्ति पलायनको ठूलो असर दुइ पाङ्ग्रे सवारीको व्यवसायमा परेको छ’ अध्यक्ष चौधरीले भने, ‘दुइ पाङ्ग्रेका ग्राहक खाडी मुलुकमा पुगेका छन्, यसको असर अर्बौ लगानी गरेर करोडौँ राजस्व तिर्ने व्यवसायीहरुलाई परेको छ ।’
उनले अटोमोबाइल्स क्षेत्र सानो क्षेत्र नभई राज्यलाई सबैभन्दा बढी कर तथा राजस्व तिर्ने क्षेत्र भएकाले यो क्षेत्रलाई अनुकुल हुने गरि नीतिहरु आउनुपर्ने पनि बताएका छन् । अहिले जनताले गाडी तथा मोटरसाइकललाई अति आवश्यक साधनका रुपमा लिने गरेको भएपनि सरकार र सम्बन्धित निकायहरुले भने अटोमोबाइल्सलाई जहिल्यै लक्जरी साधनका रुपमा ब्याख्या गरिरहेकोमा अध्यक्ष चौधरीले दुःखेसो पनि जनाएका छन् ।
‘आजभन्दा दुइ दशक अगाडी अटोमोबाइल्स लक्जरीयस् थियो होला, तर आज यो आवश्यकताको साधन हो’ उनले भने ।
