नेपाल उद्योग वाणिज्य महासंघले प्रदेश महासंघ र जिल्ला नगर उद्योग वाणिज्य संघहरुलाई सामाजिक सद्भाव कायममा सक्रिय हुन आग्रह गरेको छ ।
सुनसरीसहित तराईका विभिन्न क्षेत्रमा देखा परेका अशान्त वातावरण, श्रृङ्खलाबद्ध घटनाहरू र सर्वसाधारणबीच उत्पन्न तनावप्रति गम्भीर ध्यानाकर्षण भएको जनाउँदै महासंघले सामाजिक सद्भावका लागि सक्रिय रहन लागि प्रदेश महासंघ तथा जिल्ला नगर संघहरूलाई आग्रह गरेको हो ।
महासंघले यसअघि नै वर्तमान तनावपूर्ण स्थितिलाई साम्य पार्दै शान्ति र सहिष्णुता कायम राख्नका लागि सबै पक्षलाई संयमता अपनाउन आह्वान गरिसकेको छ ।
महासंघले पुनः प्रदेश महासंघ तथा जिल्ला नगर संघहरूलाई स्थानीय प्रशासन, राजनीतिक दल, नागरिक समाज, धार्मिक गुरुहरू तथा स्थानीय अगुवाहरूसँग आवश्यक समन्वय गरी शान्ति र भाइचारा कायम राख्ने काममा सक्रिय पहल गर्न आग्रह गरेको हो ।
महासंघले परिस्थिति अनुसार स्थानीय प्रशासनको अनुमतिमा आवश्यकता हेरी सद्भाव र्याली आयोजना गरी शान्ति र सद्भावको वातावरण बनाउन पनि अपिल गरेको छ ।
