कुवेतस्थित नेपाली दूतावासले कुवेत र इराकमा रहेका नेपालीहरुलाई उच्च सतर्कता अपनाउन आग्रह गरेको छ । स्थानीय सुरक्षा अवस्था ध्यानमा राखेर सतर्कता अपनाउन दूतावासले अनुरोध गरेको हो ।
दूतावासले एक सूचना जारी गरेरै कुवेत र इराकका आधिकारिक निकायबाट जारी हुने निर्देशन तथा सूचनाको पूर्णपालना गर्न नेपाली समुदायलाई अनुरोध गरेको छ ।
अपुष्ट तथा भ्रामक सूचना सामाजिक सञ्जालमा सेयर नगर्न र प्रतिबन्धित गतिविधिमा संलग्न नहुन पनि दूतावासले भनेको छ । आकाशमा देखिने कुनै पनि हवाई आक्रमण, प्रतिरक्षा गतिविधि वा त्यस्ता घटनासँग सम्बन्धित तस्विर तथा भिडियो खिचेर सामाजिक सञ्जालमा नराख्न पनि दूतावासले अनुरोध गरेको छ ।
शंकास्पद वस्तुको नजिक नजान तथा साइरन बज्नासाथ भवन बाहिर रहेका व्यक्तिहरुले तुरुन्तै नजिकको भवनभित्र आश्रय लिन र भवनभित्र रहेका व्यक्तिले सुरक्षित स्थानमै बस्न आग्रह गर्दै दूतावासले भवनभित्र बस्दा पनि सिसा भएका झ्याल वा बार्दली नजिक नबस्न भनेको छ ।
इरानले खाडी लक्षित आक्रमण सुरु गरेपछि दूतावासले यस्तो निर्देशन जारी गरेको हो ।
