आज बुधबार साँझदेखि भोलि बिहीबार बिहानसम्म देशका विभिन्न ठाउँमा तिब्र गतिको हावाहुरी चल्ने भएको छ । जल तथा मौसम विज्ञान विभागको मौसम पूर्वानुमान महाशाखाले तिब्र हावाहुरीको चेतावनी दिएको हो ।
महाशाखाका अनुसार आज वैशाख १६ गते बुधबार, सुदूरपश्चिम प्रदेशका कन्चनपूर, डडेलधुरा र डोटी सहित आसपासका जिल्ला, लुम्बिनी प्रदेशका बर्दिया, बाँके, दाङ, अर्घाखाँची, परासी सहित आसपासका जिल्ला, गण्डकी र बागमती प्रदेशका नवलपूर र चितवन आसपासका जिल्ला, मधेश प्रदेशका बारा, पर्सा र धनुषा सहित आसपासका जिल्ला र कोशी प्रदेशको झापा र मोरङ सहित आसपासका जिल्लामा तीब्र गतिको हावाहुरी चल्ने सम्भावना छ ।
हावाहुरी बुधबार दिउँसो ४ बजे सुरु हुने र बिहीबार बिहान ६:४५ बजे सकिने छ । सो समयमा विशेष सतर्कता अपनाउन महाशाखाले आग्रह गरेको छ ।
मेघगर्जन / चट्याङ्ग / हावाहरी / असिना सहित पानी पर्ने प्रणाली पश्चिमदेखि क्रमशः पूर्वतीर सर्दै जाने सम्भावना रहेकोले देशका धेरै ठाउँहरूमा यसको प्रभाब पर्ने सम्भावना रहेको महाशाखाले जनाएको छ ।
