तपाईं सपरिवार घुम्न जाने वा कुनै सभा, समारोह, भेटघाटका लागि कतै जाने योजना बनाउनेबित्तिकै दिमागमा आईहाल्ने विषय हुन् – सवारी साधन, यात्रामा हुने असुविधा र झन्झट !
आफुसँग सवारी साधन नभएको अवस्थामा यात्राका लागि सार्वजनिक सवारी साधनका अलावा राईड सेयरिङ र सवारी साधन भाडामा उपलब्ध गराउने कम्पनीहरु प्रमुख विकल्प हुन् ।
कतै बाटो राम्रो भएपनि सार्वजनिक सवारी साधनको सहजता छैन । कतै बाटो-घाटो, सवारी साधनमात्रै नभएर गन्तव्यकै बारेमा पनि राम्रो ज्ञान छैन । यी समस्या हाम्रो दैनिक जीवनमा दोहोरिईरहन्छन् ।
यात्राको सन्दर्भमा आउने यस्ता अनेकथरी द्विविधा र तनावबाट मुक्ति दिने विकल्पको रुपमा सवारी ‘रेन्टल’ कम्पनीहरुको संख्या बढ्दै गईरहेको छ ।करीब एक दशकदेखि सवारी ‘रेन्टल’ मार्फत आरामदायी यात्राको सारथी बन्दै एकमुष्ठ समाधान सहित सेवा दिँदै आएको कम्पनी हो, माउन्टेन भेहिकल नेपाल ।
उत्कृष्ट सेवा नै कम्पनीको पहिचान
पर्यटन क्षेत्रमा लामो अनुभव भएका उद्यमी युवाले सञ्चालन गरेको यो कम्पनी स्वदेशी तथा विदेशी पर्यटकहरुको प्रमुख रोजाई बन्न पुगेको छ । कम्पनीका सञ्चालक भरत सिंखडा भन्छन्, “गुणस्तरीय सेवा र ग्राहकको दिगो सन्तुष्टि नै हाम्रो पहिचान हो ।”
विश्वप्रसिद्ध ट्राभल गाईड कम्पनी ट्रिप एडभाईजरको रेटिङले पनि सिंखडाको दाबीलाई पुष्टि गर्छ । ट्रिप एडभाईजरका अनुसार माउन्टेन भेहिकल नेपाल काठमाडौंमा सञ्चालित ५ सय ८ वटा ट्राभल कम्पनीमध्ये १४औँ स्थानमा पर्छ ।
गन्तव्य र रोजाई अनुसारका सवारी साधन
काठमाडौँको ठमेलमा रहेको यो कम्पनीले सबै यात्रा-गन्तव्यको लागि सवारी सेवा दिँदै आएको छ । सेवाग्राहीको आवश्यकता अनुसार सेडान, एसयूभी, फोर-ह्वील ड्राईभ, जीप-भ्यान, कोस्टर र लक्जरी टुरिस्ट बसहरु यहाँबाट भाडामा लिन सकिन्छ ।
पोखरा, मुक्तिनाथ, चितवन र लुम्बिनी सबैभन्दा बढी सेवाग्राहीले रोज्ने गन्तव्य हुन् । सञ्चालक सिंखडाका अनुसार पछिल्लो समय सपरिवार रारा घुम्न जाने आन्तरिक पर्यटकको संख्या बढ्दै गईरहेको छ ।
कम्पनीले काठमाडौं उपत्यकाभित्र र उपत्यका बाहिर लामो तथा छोटो दुरीका सबै पर्यटकीय गन्तव्यका लागि सवारी साधनहरु उपलब्ध गराउँदै आएको छ ।
विदेशी सेवाग्राही धेरै, नेपालीको संख्या बढ्दै
माउन्टेन भेहिकल नेपाल माउन्टेन ट्रेक्स नेपालको भगिनी संस्थाको रुपमा स्थापना भएकोले यो कम्पनीका सेवाग्राही मूलतः विदेशी पर्यटकहरु हुन् । यो कम्पनी हिमाल आरोहण र पदयात्राका लागि नेपाल आउने पर्यटकको रोजाईमा वर्षौंदेखि पर्दै आएको छ ।
हिजोआज आन्तरिक पर्यटकको संख्या तुलनात्मकरुपमा वृद्धि भएसँगै पारिवारिक र व्यक्तिगत भ्रमणको सिलसिलामा सवारी साधन भाडामा लिनेको संख्या पनि क्रमशः बढ्दै गएको कम्पनीको भनाई छ । आन्तरिक पर्यटकको प्रमुख गन्तव्य भने मुक्तिनाथ र उपल्लो मुस्ताङ रहेको छ ।
सुरक्षित सेवा र विविध प्याकेजहरु
पछिल्लो समय काठमाडौंमा रहेका सवारी रेन्टल कम्पनीहरुले ‘सेल्फ ड्राईभ’ सेवा समेत दिँदै आएको भएपनि माउन्टेन भेहिकल नेपालले ड्राईभरबिनाको सवारी साधन लिने सुविधा दिँदैन ।
कम्पनीका अनुसार ‘सेल्फ ड्राईभ’ सेवा यात्रु र सवारी साधन दुवैको सुरक्षाका हिसाबले जोखिमपूर्ण हुन्छ । सुरक्षाको साथै सेवाको गुणस्तरका दृष्टिले समेत जुनसुकै गन्तव्यको लागि ड्राईभर सहितको सेवामात्रै दिने गरिएको कम्पनीको दाबी छ ।
स्वदेशी र विदेशीको प्राथमिकतामा फरक
विदेशी पर्यटकले आफ्नो भ्रमण प्याकेज र गन्तव्यका आधारमा अग्रिम बुकिङ गरेर सवारी सेवा लिन्छन् । खासगरी हिमाल आरोहण र पदयात्राका गन्तव्यहरुसम्म पुग्नसक्ने लक्जरी सवारी साधन विदेशी पर्यटकको रोजाईमा पर्दछ ।
पछिल्लो समय नेपालीहरु पनि परिवार वा साथीभाईसहित विभिन्न गन्तव्यको भ्रमण गर्ने चलन बढ्दै गएको छ । आन्तरिक पर्यटकहरुले आफ्नो समुहको संख्या र गन्तव्यको आधारमा विकल्प रोज्ने गर्दछन् ।
दैनिक भाडा कति पर्छ ?
कम्पनीले गन्तव्य र सेवाग्राहीको माग अनुसार दैनिक, साप्ताहिक, मासिक र एकतर्फी वा दुईतर्फी यात्राको लागि सबै किसिमका सवारी साधन उपलब्ध गराउँदै आएको छ ।
सिंखडाका अनुसार सामान्यतया सवारी साधनको भाडा प्रतिदिन ४५ सयदेखि १० हजार रुपैयाँसम्म पर्छ । त्यसमा गाडीको ईन्धन सेवाग्राही आफैले भर्ने विकल्प पनि छ ।
सवारी साधन आफ्नो अनुकुलताका आधारमा अनलाईन वा अफलाईन बुकिङ गर्न सकिन्छ ।
