आयल निगमले पेट्रोलियम पदार्थको मूल्य बढाएसँगै सार्वजनिक सवारी साधनको भाडा पनि बढ्ने भएको छ । निगमले चैत महिनायता मात्रै २ पटक इन्धनको मूल्य बढाएपछि अब सार्वजनिक यातायातको भाडादर पनि समायोजन हुने भएको हो ।
यसअघि चैत १ गते पेट्रोल र डिजेलमा प्रतिलिटर क्रमशः १५ र १० रुपैयाँ मूल्य बढ्नासाथ व्यवसायीहरुले गाडी भाडा बढाउन दबाब दिएका थिए । अहिले पुनः प्रतिलिटर १५ रुपैयाँले मूल्य बढेको छ । यसअघि बढेको मूल्यका आधारमा यातायात व्यवस्था विभागले सार्वजनिक सवारी साधनको भाडा बढाउन सरकारलाई सिफारिस गरिसकेको छ ।
वैज्ञानिक भाडादर समायोजन विधिका अनुसार भाडा वृद्धि गर्न विभागले भौतिक पूर्वाधार तथा यातायात मन्त्रालयमा प्रस्ताव पठाएको हो । विभागले चैत ५ गते नै भाडा समायोजनको प्रस्ताव मन्त्रालयमा पठाएको हो । तर, मन्त्रालयले स्वीकृति दिएको छैन । जसका कारण चैत ११ गते यातायात व्यवसायी राष्ट्रिय महासंघले सरकारले (मन्त्रालयले) तत्काल भाडादर स्वीकृत नगरे विभागले गरेको प्रस्ताव बमोजिमको भाडादर अशुल्न थाल्ने चेतावनी दिएको छ ।
अहिले फेरी इन्धनको मूल्य बढेकाले अब कम्तीमा यातायात व्यवस्था विभागको सिफारिस अनुसारको भाडादर चाँडै लागू हुने देखिएको छ । यातायात व्यवसायी राष्ट्रिय महासंघका कार्यबाहक अध्यक्ष सरोज सिटौलाले तत्काल भाडादर समायोजन हुनुपर्ने बताउँदै यदि भाडादर नबढाए गाडी नै नचलाउने सम्मको चेतावनी दिएका छन् ।
इन्धनको मूल्य तलमाथि हुँदा ५ प्रतिशतभन्दा बढीको फरक पर्नासाथ भाडादर समायोजन गर्ने नीतिगत व्यवस्था स्मरण गराउँदै उनले इन्धनको मूल्य बढेका कारण व्वसायीहरुले दैनिक ठूलो घाटा ब्यहोरिरहेको बताए ।
कति बढ्दैछ भाडा ?
विभागले मन्त्रालयमा गरेको सिफारिसअनुसार लामो दूरीका सार्वजनिक यातायातमा ११.३३ प्रतिशत भाडा बढाउन सुझाइएको छ । मालवाहकमा ८.५९ प्रतिशत र पहाडी क्षेत्रमा सञ्चालन हुने मालबाहक सवारीमा १४.१९ प्रतिशतसम्म भाडा बढाउन विभागले मन्त्रालयमा प्रस्ताव पठाएको छ ।
सिफारिस अनुसारको भाडादर लागू भएमा अब काठमाडौँ उपत्यकामा गाडी चढ्नासाथ २२ रुपैयाँ २६ पैसा भाडा लाग्नेछ । अहिले काठमाडौँमा गाडी चढ्नासाथ २० रुपैयाँ तिर्नुपर्छ ।
यसैगरी, अब ट्याक्सीको पनि भाडा बढ्ने छ । यद्यपी, ट्याक्सीको मिटर समायोजन नभएको पनि लामो अवधि भइसकेको छ । यसकारण ट्याक्सीको पनि भाडा बढाउनुपर्ने उनीहरुको माग छ ।
