जेनजीको आन्दोलन पश्चात नयाँ सरकार बन्न नसक्दा अहिले मुलुक सरकार बिहिनको अवस्थामा छ । यस्तो अवस्थामा खाना पकाउने एलपी ग्यास, पेट्रोल र डिजेल हाहाकार हुन सक्ने भन्दै उपभोक्ताहरु त्रसित भएका छन् ।
उपत्यकाका निजी पेट्रोलपम्पहरु करिब करिब सबै बन्द अवस्थामा छन् । बिहान ७ः०० बजेदेखि १०ः०० बजेसम्म र साँझ ५ः०० बजेदेखि ७ः०० बजेसम्म मात्रै पेट्रोल पम्पहरु खुल्दै आएका छन् ।
यता, नेपाल आयल निगमका अनुसार भने अहिले भारतबाट ग्यासको आयात रोकिएको छ । आन्दोलनभन्दा पहिले नै भन्सार पास भएका ग्यासका बुलेटहरु नेपाल आइरहेपनि नयाँ बुलेटहरु आउने क्रम रोकिएको छ ।
तर, आयल निगमले पेट्रोलियम पदार्थ अभाव भने नरहेको बताएको छ । निगमका प्रवक्ता मनोज ठाकुरका अनुसार पाइप लाइनबाट पेट्रोलियम पदार्थ आयात हुने भएकाले अभाव हुने अवस्था छैन । अहिले नै ग्यास, हवाई इन्धन र पेट्रोलियम पदार्थ अभाव हुन्छ भन्ने हल्लामा सत्यता नरहेको उनको भनाइ छ ।
तर, अहिले उद्योगीहरुसँग भएको खाना पकाउने ग्यासको स्टकले भने ५ दिनलाई मात्रै पुग्ने अवस्था छ । उद्योगीहरुले सेनालाई भारतबाट ग्यास ल्याउने गाडीलाई सहजीकरण गरिदिन अनुरोध गरेका छन् ।
नेपालमा दैनिक १ लाख सिलिण्डर खाना पकाउने ग्यासको माग छ ।
