नेपाल रिकन्डिसन अटो व्यवसायी संघले यस वर्षदेखि मनाउन सुरु गरेको ‘अटो व्यवसायी दिवस’को अवसरमा बृहत् रक्तदान कार्यक्रम आयोजना गरेको छ । संघले रेडक्रस सोसाइटी सँगको सहकार्यमा रक्तदानसँगै सरसफाई कार्यक्रमसमेत आयोजना गरेको संघका अध्यक्ष रमेश कोइरालाले जानकारी दिए ।
अध्यक्ष कोइरालाको अध्यक्षतामा भएको औपचारिक कार्यक्रममा यातायात व्यवस्था कार्यालय ललितपुरको प्राङ्गणमा रक्तदान कार्यक्रम आयोजना गरिएको हो । कार्यक्रममा कुल ७० जनाले रक्तदान गरेका छन् ।
संघले स्थापना कालदेखि नै यस्ता सामाजिक काम गर्दै आएको र अहिलेको रक्तदान, सरसफाई पनि सोही सामाजिक कामकै निरन्तरता भएको बताएको छ । आगामी दिनमा अझ प्रभावकारी रुपमा यस्ता सामाजिक गतिविधि अघि बढाउँदै जाने र संघका सदस्यहरुको क्षमता विकासमा थप प्रभावकारी कदम चाल्दै जाने अध्यक्ष कोइरालाले प्रतिवद्धता जनाएका छन् ।
संघले हरेक वर्षको जेठ २६ गतेलाई ‘अटो व्यवसायी दिवस’का रूपमा मनाउने निर्णय गरे बमोजिम यस वर्षबाट औपचारिक रुपमा यस दिवसको शुभारम्भ भएकोमा अध्यक्ष कोइरालाले अटोमोबाइल्स व्यवसायीहरु सबैलाई बधाई समेत दिएका छन् । उनले सेकेन्डह्याण्ड अटोमोबाइल्स व्यवसायीहरुलाई एकतावद्ध बनाउन यस दिवसले महत्वपूर्ण भूमीका निर्वाह गर्ने विश्वास समेत व्यक्त गरेका छन् ।
उनले व्यवसायीहरूलाई आन्तरिक असन्तुष्टिमा नलागी संघमार्फत सबै व्यवसायीहरूको साझा उद्देश्यमा केन्द्रित हुन आग्रह पनि गरेका छन् ।
