अब सर्वोच्च अदालतका ६१ जना न्यायाधीश तथा कर्मचारीले सुजुकीको गाडी चढ्ने भएका छन् । सर्वोच्च अदालतले आफ्ना न्यायाधीश तथा कर्मचारीका लागि ६१ थान एसयुभी कार खरिदका लागि टेन्डर आह्वान गरेकोमा प्राविधिक मूल्याङ्कनमा सुजुकी मात्रै छनोट भएको हो । यससँगै अब सर्वोच्च अदालतले सुजुकीका फ्रंक्स गाडी किन्ने पक्का भएको छ ।
सर्वोच्चले बुधबार सूचना जारी गर्दै प्राविधिक प्रस्तावहरूको अध्ययन, जाँच परीक्षण तथा मूल्याङ्कन गर्दा उक्त टेण्डरमा भाग लिएका विभिन्न कम्पनीमध्ये केएमसी अटोमोबाइल्स मात्रै छनोट भएको जानकारी दिएको छ । उक्त सूचना अनुसार अब बैशाख १७ गते दिउँसो १ बजे सर्वोच्चमा उक्त फर्मको आर्थिक प्रस्ताव खोलिनेछ ।
एक मात्रै व्यापारिक कम्पनी प्राविधिक रुपमा प्रभावकारी देखिएपछि अब सर्वोच्चले केएमसी अटोमोबाइल्सबाट ६१ युनिट एसयूभी किन्नेछ । सर्वोच्चले अधिकतम ३५ लाख ४० हजार रुपैयाँ सम्ममा गाडी दिन सक्ने कम्पनीले टेण्डरमा भाग लिन सक्ने गरी बोलकबोलको सूचना प्रकाशित गरेको थियो । यसमा गाडीका विभिन्न मापदण्ड राखिएका थिए ।
सर्वोच्चले मागेको मापदण्ड अनुसार १८५ एमएम ग्राउन्ड क्लिअरेन्स हुनुपर्ने, इन्जिनको क्षमता ११५० सिसीभन्दा बढी हुनुपर्ने, ‘कर्ब वेट’ ९५० किलोग्रामभन्दा बढी हुनुपर्ने र कम्तीमा अगाडि पाँच गियर र एक रिभर्स गियर हुनुपर्ने उल्लेख थियो । यस्तै, गाडीको टर्निङ रेडियस ५.३ मिटरभन्दा बढी हुन नहुने, प्रतिलिटर कम्तीमा १७ किलोमिटर माइलेज हुनुपर्ने, गाडीको ह्वीलबेस कम्तीमा २ हजार ४८० एमएम अर्थात् २.४८ मिटर हुनुपर्ने र मोडल सन् २०२५ कै हुनुपर्ने पनि मापदण्ड तोकिएको थियो ।
यस आधारमा सुजुकी फ्रंक्स र हुण्डाई भेन्य यी मापदण्ड अनुसार योग्य हुने अनुमान गरिएको थियो । सर्वोच्च अदालतका उपरजिस्ट्रार निरञ्जन पाण्डेका २ वटा कम्पनी मात्रै टेन्डरमा सहभागी भएको बताउँदै एउटा कम्पनी फेल भएको बताए। तर, प्राविधिक मूल्याङ्कनमै सुजुकीको बिक्रेता मात्रै योग्य ठहरिएको छ ।
सर्वोच्चले चालु आर्थिक वर्षमा ६१ थान कार खरिद गर्न २१ करोड ६० लाख रुपैयाँ बजेट छुट्याएको छ ।
