विश्वभर निकै प्रतिक्षा गरिएको अमेरिकाको राष्ट्रपतीय निर्वाचनमा मतदान सम्पन्न भएर मतगणना सुरु भएको छ। पहिले मतदान सकिएका राज्यहरुबाट मतगणना सुरु भएको हो।
अमेरिकामा धेरै वटा टाइम जोन रहेको छ। यस कारण पूर्वी क्षेत्रमा रहेका राज्यले पहिले मतदान गरेका थिए भने क्रमश अन्य राज्यले पनि मतदान गरेका थिए । सोहि अनुसार मतगणना सुरु भएको हो ।
यस निर्वाचनका लागि डेमोक्र्याटिक पार्टीका तर्फबाट वर्तमान उपराष्ट्रपति कमला ह्यारिस र रिपब्लिकन पार्टीबाट पूर्वराष्ट्रपति डोनाल्ड ट्रम्प मैदानमा छन्। कूल इलेक्ट्रोल कलेजको पाँच सय ३८ मध्ये दुई सय ७० भोट ल्याउनेले निर्वाचनमा जीत हासिल गर्ने छन्। मतगणनाको सुरुवाती चरणमा रिपब्लिकन पार्टीबाट उम्मेदवार बनेका पूर्वराष्ट्रपति डोनाल्ड ट्रम्पले प्रारम्भिक अग्रता लिएका छन् ।
मतदाताहरूको प्रत्यक्ष मतदान र ‘इलोक्ट्रोल कलेज’को सम्मिश्रणका आधारमा निर्वाचित गरिने अमेरिकाको राष्ट्रपतीय निर्वाचनको नतिजा यो पटक निकै प्रतिस्पर्धात्मक हुने अनुमान गरिएको छ।
अमेरिकामा रहेका कूल ५० राज्यमध्ये मुख्य सात एरिजोना, जर्जिया, मिचिगन, नाभडा, नर्थ क्यारालिना, पेन्सलभेनिया र विसकन्सिनलाई स्विङ्ग (मतदाताले अन्तिम समयमा निर्णय गर्ने) राज्यका रूपमा परिभाषित गरिएको छ। अमेरिकाको राष्ट्रपति निर्वाचन जित्न यी राज्यको नतिजा धेरै महत्वपूर्ण हुन्छ ।
यसमध्ये सबैभन्दा बढी ध्यान पेन्सल भेनियामा रहेको छ। यी राज्यहरूको विगतको निर्वाचनको नतिजा हेर्दा सन् २०१६ मा डोनाल्ड ट्रम्पले पाँच वटा स्विङ्ग राज्यमा जीत हासिल गरेर निर्वाचित भएका थिए। उता सन् २०२० मा जो वाइडेनले छ वटा राज्यमा जीत हासिल गरेर राष्ट्रपति बन्न सफल भएका थिए।
पेन्सलभेनिया कति महत्वपूर्ण छ भन्ने विषय उक्त राज्यमा रिपब्लिकन र डेमोक्रयाट पार्टीले सबै प्रकारका चुनावी अभियानमा सबै प्रकारका सञ्चारमध्यमहरूमा खर्च गरेका एक अर्ब २० करोड डलरको विज्ञापन गरेका थिए । सन् २०२४ को चुनावमा अमेरिकाभर कूल १० अर्व ५३ करोड विज्ञापनमा खर्च गरिएकामा त्यसमध्ये ११ प्रतिशत एउटै राज्यमा खर्च गरिएको थियो।
