खाद्य प्रविधि तथा गुण नियन्त्रण विभागले करेन्ट चाउचाउको बिक्रीमा रोक लगाएको छ । ब्याच नम्बर ०४ए का सबै उत्पादन बजारबाट फिर्ता गर्न निर्देशन दिँदै विभागले बिक्री वितरणमा पनि रोक लगाएको हो ।
विभागले २०२६ फेब्रुअरी २३ मा उत्पादन गरिएका १०० ग्राम तौल भएका करेन्ट चाउचाउ तत्काल बजारबाट फिर्ता गर्न निर्देशन दिएको हो । करेन्ट चाउचाउ उत्पादन गर्ने कम्पनी तिलोत्तमा रुपन्देहीस्थित यशोधा फुड्सलाई निर्देशन दिँदै विभागले बजारबाट चाउचाउ फिर्ता गर्न र बिक्री वितरण नगर्न निर्देशन दिएको हो ।
खाद्य स्वच्छता तथा गुणस्तर ऐन २०८१ बमोजिम संकलन गरिएको नमूना प्रयोगशालामा परीक्षण गर्दा एक्सट्राक्टेड फ्याटको एसिड भ्यालू सरकारले तोकेको अनिवार्य गुणस्तरको मापदण्ड अनुसार नपाइएपछि विभागले बजारबाट चाउचाउ फिर्ता गर्न र बिक्री रोक्न निर्देशन दिएको हो । विभागले खाद्य स्वच्छता तथा गुणस्तर ऐन २०८१ को दफा ३८ (२) बमोजिम उक्त ब्याचका सबै चाउचाउ बजारबाट फिर्ता गर्ने निर्देशन दिँदै सोही दफाको उपदफा ४ अनुसार बिक्री वितरण नगर्न पनि यशोधा फुड्सलाई निर्देशन दिएको हो ।
