नेपाल उद्योग वाणिज्य महासंघको अध्यक्षबाट अब चन्द्र ढकाल बिदा हुँदैछन् । ६०औँ साधारणसभा बैशाख २१ गते उद्घाटन भएर खुलासत्र सकिएपछि बन्दसत्र (निर्वाचन सहितका कार्यक्रम) प्रारम्भ हुन्छ । बैशाख २२ गते निर्वाचन हुनेछ ।
महासंघको विधान अनुसार अब हालका वरिष्ठ उपाध्यक्ष अन्जन श्रेष्ठ स्वतः अध्यक्ष बन्दैछन् । उनी महासंघको २१औँ अध्यक्ष हुनेछन् । ढकालसम्म आइपुग्दा महासंघले २० जना अध्यक्ष पाइसकेको छ ।
को हुन् अन्जन श्रेष्ठ ?
अन्जन श्रेष्ठ २०५९ सालमा महासंघको कार्यसमितिमा प्रवेश गरेका थिए । पोखराबाट उदाएको लक्ष्मी ग्रुप उद्योग र ट्रेडिङमा देशब्यापी रुपमै जम्दै जाँदा अन्जनले पनि महासंघभित्र क्रमशः खुड्कीला चढ्दै गए ।
हाल उनी लक्ष्मी ग्रुपको प्रबन्ध निर्देशक छन् । यो समूह ठूला रोजगारदाता मध्येमा पनि पर्छ । लक्ष्मी ग्रुप अन्तर्गतका उद्योग प्रतिष्ठान र कम्पनीमा गरेर ३२ सयभन्दा बढीले रोजगारी पाएका छन् ।
पारिवारिक व्यवसायका रुपमा चलिरहेको चकलेट फ्याक्ट्रीमा उनले २०४५ सालदेखि काम सुरु गरेका हुन् । जुन अहिलेपनि नेपालकै सबैभन्दा ठूलो कन्फेक्सनरीका रुपमा रहेको आजको सुजल फुड हो । लक्ष्मी ग्रुप नेपालमा हुन्डाई गाडीको आयातकर्ता पनि हो । उत्पादनतर्फ सुजल फुड र समृद्धि स्टिल उद्योग यस ग्रुप अन्तर्गत सञ्चालित छन् ।
लक्ष्मी ग्रुपले नेपालमै हुन्डाईको एसेम्बल प्लान्ट पनि लगाएको छ । चार पाङ्ग्रेको एसेम्बल प्लान्ट सुरु गर्ने लक्ष्मी हुन्डाई पहिलो र अहिलेसम्म एक मात्रै एसेम्बल प्लान्ट हो ।
३७ वर्षभन्दा लामो अवधिदेखि व्यवसायमा रहेका श्रेष्ठ कुशकुमार जोशी अध्यक्ष हुँदा महासंघको कार्यसमितिमा प्रवेश गरेका हुन् । यो २०५९ सालको कुरा हो । त्यसैबेला उनले राजस्व समितिको उपसभापतिको जिम्मेवारी सम्हाल्ने अवसर पाएका थिए । महासंघको प्रवेश गरेको २३ वर्षपछि उनी अध्यक्ष बन्न लागेका हुन् ।
महासंघभित्र राजस्व समिति, उद्योग समिति र रोजगारदाता परिषदमा बसेर योगदान दिएका उनी गत निर्वाचनमा वरिष्ठ उपाध्यक्षमा निर्वाचित भएका थिए । अब विधानको प्रावधान अनुसार उनी स्वतः अध्यक्ष बन्दैछन् । विधानको यो प्रावधान अनुसार अध्यक्ष बन्ने उनी नै अन्तिम व्यक्ति हुनेछन् । अर्को पटकदेखि प्रत्यक्ष निर्वाचनमार्फत अध्यक्ष चयन हुने गरी विधान संशोधन भइसकेको छ ।
महासंघको स्थापना २०२२ साल पुस १४ गते भएको हो । महासंघको संस्थापक अध्यक्ष स्वर्गीय लोकनाथ जोशी हुन् ।
