काठमाडौँ उपत्यकामा बर्डफ्लू संक्रमणले तीव्र रुप लिएको छ । तीन महिना अगाडिबाट हालसम्म आइपुग्दा काठमाडौँमा बर्डफ्लू संक्रमण तीव्र रूपमा फैलिन थालेको पशुसेवा विभागले जनाएको छ ।
विभागका अनुसार हालसम्म अहिलेसम्म विभिन्न ११ जिल्लाका ८२ स्थानमा यसको संक्रमण पुष्टि भइसकेको छ । चैत ४ गते मोरङमा बर्डफ्लू संक्रमण पुष्टि भएको थियो । त्यसयता झापा, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेपलाञ्चोकसम्म संक्रमण फैलिएको छ ।
विभागले रोग नियन्त्रणका लागि प्रभावित क्षेत्रमा विशेष सतर्कता अपनाएको जनाएको छ । हालसम्म ५ लाख ६९ हजार ८५८ वटा पन्छी नष्ट गरिएको छ । पशुसेवा विभागका महानिर्देशक उमेश दाहालका अनुसार ९ लाख ८९ हजार ३१३ वटा अण्डा र १ हजार ९५४ क्विन्टल दाना पनि नष्ट गरिएको छ ।
यद्यपी, विभागले बर्डफ्लू नियन्त्रण हुने क्रम पनि बढिरहेको जनाएको छ । झापा, मोरङ, सुनसरी, बारा, महोत्तरी, चितवन र नवलपरासीमा संक्रमण नियन्त्रणमा आइसकेको जनाएको छ । काठमाडौं, ललितपुर, भक्तपुर र काभ्रेपलाञ्चोकमा भने संक्रमण बाँकी नै रहेको विभागले जनाएको छ ।
विभागले कुखुरा तथा विभिन्न पन्छी पालक किसानलाई फार्ममा जैविक सुरक्षाका मापदण्ड कडाइका साथ पालना गर्न, अण्डाका पूराना क्रेट पुनःप्रयोग नगर्न, ढुवानीका साधनमा निसंक्रमण गर्न र जंगली पन्छीसँग घरपालुवा पन्छीको सम्पर्क हुन नदिन आग्रह गरेको छ ।
