नेपाल उद्योग वाणिज्य महासंघको बैठक अहिले जारी छ । अपरान्ह १ बजेदेखि सुरु भएको कार्यकारिणी समितिको बैठकमा अहिले केन्द्रीय सदस्यहरुले धारणा राखिरहेका छन् ।
कार्यकारिणी समितिको १६औँ बैठकमा १८ वस्तुगत संघहरुको सदस्यता खारेजी पश्चात उत्पन्न विवादको विषयमा छलफल भइरहेको छ । सदस्यता समितिका सभापतिसमेत रहेका निवर्तमान अध्यक्ष शेखर गोल्छा भने आजको बैठकमा उपस्थित छैनन् । बैठकमा पदाधिकारी र केन्द्रीय कार्यकारिणी समिति सदस्य गरी ६१ जनाले उपस्थिति जनाएका छन् ।
चैत २९ र ३० गतेका लागि तोकिएको महासंघको साधारणसभा र निर्वाचन सदस्यता विवादकै कारण अदालतको आदेशबाट स्थगित भएको छ । बैशाख २१ र २२ का लागि नयाँ मिति तोकिएपनि बुधबारको बैठकले विवाद सुल्झाउने निष्कर्ष निकाल्नेमा सदस्यहरु ढुक्क छैनन् ।
‘सुरुमा अदालतको आदेशबाट खारेजीमा परेका १८ वटा संघहरुको सदस्यता कायम गरेर जाँदा सदस्यता दिनु हुँदैन भन्ने पक्ष फेरि अदालत गइहाल्छ, सदस्यता नदिई साधारणसभा र निर्वाचनमा जाँदा अदालतको चैत २६ को आदेश अनुसार मेल खाँदैन’ एक जना केन्द्रीय सदस्यले भने, ‘आजको बैठकले विवादको मिलन विन्दु पहिल्याउन सक्ने अवस्था पनि छैन । त्यसकारण बैशाख २१ र २२ मै साधारणसभा र निर्वाचन हुनेमा अझै पनि शंका कायमै छ ।’
बैठक जारी रहँदा केहीबेर महासंघको कार्यालय बाहिर सदस्यता खारेजीमा परेका संघ तथा महासंघहरुले विरोध प्रदर्शन गरेका थिए ।
