दैलेखमा बैशाख ७ गतेदेखि १९ गतेसम्म प्रादेशिक महोत्वस आयोजना हुने भएको छ । ‘कृषि, उद्यम, पर्यटन र व्यापार, समृद्ध दैलेखको आधार’ भन्ने नाराका साथ आयोजना गर्न लागिएको महात्वसवबाट कर्णाली प्रदेशको पहाडी जिल्ला दैलेखका स्थानीय उत्पादन र त्यहाँको पर्यटन प्रवद्र्धनमा टेवा पुग्ने विश्वास लिइएको छ ।
नेपाल उद्योग वाणिज्य संघ दैलेखका पूर्व अध्यक्ष यम मल्लका अनुसार महोत्सवमा कर्णाली भल्किने १८० स्टलहरु रहने छन् । यीमध्ये ३० वटा स्थानीय उत्पादनका मात्रै स्टलहरु रहने छन् भने महोत्सव अवधिभरमा करिब ५ लाख दर्शकले अवलोकन गर्ने लक्ष्य लिइएको आयोजकले जनाएको छ । मल्लका अनुसार उत्पादन, पर्यटन, कृषि जस्ता सम्भावनाका क्षेत्रहरु पहिचान गर्दै दैलेखमा लगानी भित्र्याउने लक्ष्यसमेत राखिएको छ ।
संघका पूर्व अध्यक्ष शान्ति प्रसाद शर्माले दैलेखको सम्पदा, संस्कृति, परम्परा, पर्यटन, इतिहासका विषयमा समेत महोत्सवमा जानकारी दिइने बताए । कृषि, जलविद्युत, पर्यटनका हिसावले महत्वपूर्ण जिल्लाका रुपमा रहेको दैलेखको विकासका लागि सबैको साहयोग आवश्यक पर्ने उनको भनाइ छ । जिल्लामा सुन, तामा लगायतका खानी भएकाले त्यसयको उत्खनन् गर्न सकिएको खण्डमा जिल्लाको मुहार फेरिने उनको भनाइ छ । अर्को तर्फ पेट्रोलियम खानी भएको पुष्टि भइसकेको अवस्थामा त्यसबाट इन्धन निकालेर प्रयोग गर्नेतर्फ उचित ध्यान दिन पनि उनले सरकारलाई आग्रह गरे ।
जिल्लाका उद्योगी व्यवसायीले मात्रै लगानी गरेर जिल्लाको विकास सम्भव नहुने भएकाले बाह्य लगानी भित्र्याउनका लागि पनि यो महोत्सव महत्वपूर्ण हुने बताए । जिल्लाको पेट्रोलियम खानी उत्खननका विषयमा अघिल्लो सरकासँग कुरा हुँदा फागुन÷चैत बाट नै सुरु गर्ने भनिएको भए पनि अहिले अलपत्र परेको भन्दै यसमा पनि सरकारले ध्यान दिनु पर्ने उनको भनाइ छ ।
दैलेखी सेवा समाजका अध्यक्ष प्रताव शाहीले जीवन, भुगोल, भाषा, संस्कृति, भेषभुषाका कारण दैलेख सम्भावना बोकेको जिल्ला भएको बताउँदै सबैको हातेमालोबाट जिल्लाको विकास सम्भव रहेको बताएका छन् ।
फोटो पत्रकार तथा मनधरी फाउण्डेसनका अध्यक्ष भरतबन्धु थापाले भाषाको उत्पति भएको क्षेत्र राज्यले नै पछि पारेको भन्दै आफ्नो तर्फबाट महोत्वस सफल पार्नका लागि गर्ने सहयोग गर्ने प्रतिवद्धता जनाए ।
