सेवा निवृत्त राष्ट्रसेवक कर्मचारीहरूको निवृत्तभरण व्यवस्थापन सम्बन्धी सम्पूर्ण कार्यलाई स्वचालित बनाउने गरी विकास गरिएको e-Pension Verification System को शुभारम्भ भएको छ। अर्थमन्त्री डा. स्वर्णिम वाग्लेले आज यस प्रणालीको शुभारम्भ गरेका हुन् ।
यस संगै अब सेवा निवृत्त राष्ट्रसेबक कर्मचारी (निजामती, शिक्षक, नेपाली सेना, प्रहरी) ले निवृत्तभरण व्यवस्थापन कार्यालय (Pension Management Office) को वेबसाइट pension.gov.np मा गई हाम्रो सेवाहरू भित्र रहेको IPMS-V2 बटनमा क्लिक गरी आफ्नो घरबाट नै पेन्सन सम्बन्धी सेवा लिन सक्ने छन् । साथै, सेवा प्रयोगसम्बन्धी कुनै जिज्ञासा वा अस्पष्टता भएमा सोही प्रणालीमा उपलब्ध IPMS Video Tutorial हेर्न सकिने व्यवस्था मिलाइएको छ ।
यस प्रणालीको कार्यान्वयनसँगै सेवा निवृत्त राष्ट्रसेवक कर्मचारीहरूले वार्षिक रूपमा आफूले पेन्सन लिइरहेको बैंकमा भौतिक रूपमा उपस्थित भई प्रमाणीकरण गराउनु पर्ने अबस्थाको अन्त्य भएको छ । साथै, सेवाग्राहीहरुले आफूलाई पायक पर्ने बैंकमा पेन्सन खाता खोल्नका लागि निवृत्तभरण व्यवस्थापन कार्यालय जानु पर्ने बाध्यता पनि हटेको छ। यसबाट सेवा निवृत्त कर्मचारीहरूले पेन्सन सुविधा लिँदा थप सहज, मितव्ययी र प्रभावकारी हुने अपेक्षा गरिएको छ ।
महालेखा नियन्त्रक कार्यालयले आफु र मातहतका कार्यालयहरूबाट प्रदान गरिँदै आएका सरकारी सेवाहरूलाई थप सरल, सहज, नागरिकमैत्री र प्रविधिमैत्री बनाउने उद्देश्यले यो प्रणाली सुरु गरिएको जनाएको छ।
