सरकारले इन्धनमा कर घटाएसँगै अब मूल्य पनि घट्ने भएको छ । मन्त्रिपरिषद बैठकले पेट्रोल, डिजेल र मट्टितेलको आयातमा लाग्दै आएको भन्सार महशुल र पूर्वाधार विकास करमा ५० प्रतिशत छुट दिने निर्णय गरेसँगै अब मूल्य पनि घट्ने भएको हो ।
हाल पेट्रोलको आयातमा प्रतिलिटर करिब २५.२० रुपैयाँ भन्सार महशुल लाग्दै आएको छ । अब यसमा १२ रुपैयाँ छुट हुनेछ । अर्थात्, करिब १३ रुपैयाँ मात्रै कर लाग्नेछ ।
यसैगरी, डिजेलमा पनि हाल प्रतिलिटर १२ रुपैयाँ भन्सार महशुल लाग्दै आएकोमा अब ६ रुपैयाँ छुट हुनेछ । त्यसैगरी, मट्टितेलको आयातमा पनि हाल प्रतिलिटर १२ रुपैयाँ भन्सार लाग्दै आएकोमा अब भने ६ रुपैयाँ मात्रै लाग्नेछ ।
यस्तै, पूर्वाधार विकास करतर्फ पेट्रोल र डिजेलमा प्रतिलिटर समान १०÷१० रुपैयाँ कर लाग्दै आएकोमा अब ५÷५ रुपैयाँ मात्रै लाग्ने भएको छ । मट्टितेलमा भने पूर्वाधार विकास कर थिएन ।
यस आधारमा अब पेट्रोलको आयातमा लाग्दै आएको करमध्ये प्रतिलिटर १७ रुपैयाँ छुट हुने भएको छ भने डिजेलमा प्रतिलिटर ११ रुपैयाँ कर छुट हुनेछ । यस्तै, मट्टितेलमा प्रतिलिटर ६ रुपैयाँ कर छुट हुने भएको छ ।
अब आयल निगमले इन्धनमा सरकारबाट कर छुट भए बराबर नै मूल्य घटाउन सक्नेछ । यदि निगमले कर छुट बराबर नै मूल्य घटाएमा हालको मूल्यभन्दा पेट्रोल प्रतिलिटर १७ रुपैयाँ, डिजेल प्रतिलिटर ११ रुपैयाँ र मट्टितेल प्रतिलिटर ६ रुपैयाँ सस्तो हुनेछ ।
तर, अन्तर्राष्ट्रिय मूल्य घटबढ र ढुवानी शुल्क वृद्धि जस्ता कुराले मूल्यमा प्रभाव पार्ने हुँदा सरकारबाट प्राप्त कर छुट बराबरकै मूल्य घट्न नसक्ने अवस्था पनि आउन सक्ने अधिकारीहरु बताउँछन् । अहिले नै घाटामा बेच्नुपरिरहेको हुनाले मूल्य घटाउन सक्ने सम्भावना भने न्यून रहेको निगमका अधिकारीहरुको भनाइ छ ।
