नेपाल राष्ट्र बैंकको डेपुटी गर्भनरमा किरण पण्डित नियुक्त भएका छन् । आज बसेको मन्त्रिपरिषदको बैठकले राष्ट्र बैंकमा कार्यकारी निर्देशक रहेका पण्डितलाई डेपुटी गभर्नर नियुक्त गर्ने निर्णय गरेको हो । राष्ट्र बैंकमा दुई जना डेपुटी गर्भनर पद रिक्त रहे पनि सरकारले आज एक पदमा मात्र नियुक्ति गरेको हो ।
किरण पण्डित कार्यकारी निर्देशकमा बढुवा भएको १३ महिना मै डेपुटी गभर्नर नियुक्त भएका हुन् । उनी २०८१ फागुन १ मा निर्देशकबाट कार्यकारी निर्देशकमा बढुवा भएका थिए। कार्यकारी निर्देशकमा बढुवा भएको १३ महिना मै उनी डेपुटी गभर्नरमा नियुक्त भएका हुन् ।
किरण पण्डित अर्थमन्त्री डा. स्वर्णिम वाग्लेका जिल्ला(तनहुँ)वासी पनि हुन् । उनी कार्यकारी निर्देशकको सातौँ वरियतामा थिए। २०६२ सालमा राष्ट्र बैंक सेवामा प्रवेश गरेका उनी हाल विदेशी विनिमय व्यवस्थापन विभागको नेतृत्वमा छन्।
नेपाल राष्ट्र बैंक ऐनमा कार्यकारी निर्देशकहरु मध्येबाट डेपुटी गभर्नर नियुक्त गर्नु पर्ने व्यवस्था छ। राष्ट्र बैंकमा कार्यरत १८ जना कार्यकारी निर्देशक नै डेपुटी गभर्नर नियुक्तिको लागि योग्य हुन्छन् । डेपुटी गभर्नरको लागि गभर्नरले ४ जना कार्यकारी निर्देशकको नाम सिफारिस गर्ने र ति मध्ये दुई जना डेपुटी गभर्नर नियुक्त हुने व्यवस्था छ।
गत फागुन २४ गतेदेखि नेपाल राष्ट्र बैंकका दुवै डेपुटी गभर्नरको कार्यकाल सकिएपछि राष्ट्र बैंकमा डेपुटी गभर्नर पद रिक्त थियो। डेपुटी गभर्नर रहेका डा.निलम ढुंगाना र बम बहादुर मिश्रको कार्यकाल गत फागुन २४ गते सकिएको थियो।
