नेपाल उद्योग वाणिज्य महासंघको साधारणसभा एक दिन धकेलिएको छ । आज बसेको केन्द्रीय कार्यकारिणी समितिको बैठकले चैत २९ गते साधारणसभा गर्ने निर्णय गरेको हो । उद्योग वाणिज्य दिवसको अवसर पारेर हरेक वर्ष चैत २८ गते साधारणसभा हुदै आएकोमा यस वर्ष एक दिन परे सरेको हो ।
यस वर्षको साधारणसभा चुनावी साधारणसभासमेत रहेकाले अब चैत ३० गते निर्वाचन हुनेछ । विगतका वर्षहरुमा चैत २८ गते साधारणसभाको उद्घाटन हुन्थ्यो भने चैत २९ गते निर्वाचन हुने गरेको थियो ।
‘फागुन २१ मा भएको प्रतिनिधिसभा निर्वाचनको आचारसंहिताका कारण प्रदेश महासंघहरुको अधिवेशन हुन नसक्दा मिति मिलाउनका लागि एक दिन ढिला गरी साधारणसभा आयोजना गर्ने निर्णय भएको छ’ महासंघको एक जना केन्द्रीय सदस्यले बिजनेशपानालाई जानकारी दिए ।
उनका अनुसार अब प्रदेश महासंघको साधारणसभा र निर्वाचन चैत २१ गते आयोजना हुनेछ । सबै प्रदेशमा एकैदिन निर्वाचन हुने ति सदस्यले जानकारी दिए ।
‘कतिपय प्रदेशले यसअघि नै साधारणसभा र निर्वाचनको प्रक्रिया सुरु गरिसकेका थिए’ उनले थपे, ‘तर, निर्वाचनको आचारसंहिताका कारण स्थगित गर्नु परेको थियो । अब चैत २१ गते एकैदिन सबै प्रदेशमा साधारणसभा र निर्वाचन हुन्छ ।’
