लुम्बिनी प्रदेशमा पहिलो राइड सेयरिङ सेवाका रुपमा सेवा थालेको ‘ई–ड्राइभ नेपाल’ नेपालगञ्जमा पनि सुरु भएको छ । ट्याक्सी तथा मोटरसाइकल मार्फत राइड सेयरिङ सेवा दिँदै आएको ई–ड्राइभ नेपालले नेपालगञ्जमा औपचारिक रूपमा आफ्नो सेवा सुरु गरेको हो ।
नेपालगञ्ज उपमहानगरपालिकाका नगरप्रमुख प्रशान्त बिष्टले सेवाको शुभारम्भ गरेका हुन् । यससँगै ई–ड्राइभको सेवा बाँके र बर्दियामा सुरु भएको छ । रुपन्देहीमा ११० ट्याक्सी तथा पाँच सयभन्दा बढी मोटरसाइकल चालकमार्फत सेवा दिँदै आएको ई–ड्राइभले नेपालगञ्जमा प्रारम्भिक चरणमा १५ विद्युतीय ट्याक्सीमार्फत सेवा सुरु गरेको हो ।
यसअघि करिब डेढ वर्ष अघि बुटवल र भैरहवा क्षेत्रमा सुरु भएको ई–ड्राइभ अब बाँकेको प्रमुख सहर नेपालगञ्जमा विस्तार गरिएको ई–ड्राइभ लुम्बिनीका निर्देशक विजय भण्डारीले जानकारी दिए ।
कार्यक्रममा ई–ड्राइभ लुम्बिनीका अध्यक्ष राजकुमार गुप्ताले अध्ययनरत र अध्ययन सकेर बसेका युवा जनशक्तिलाई स्वदेशमै स्वरोजगार बनाउने र रोजगारी सिर्जना गर्ने लक्ष्यसहित यो सेवा सुरु गरिएको जानकारी दिए ।
हाल ई–ड्राइभ लुम्बिनीले सेवामा ७ करोडभन्दा बढी लगानी गरेको छ ।
