नेपाल र चीनबीच काठमाडौं–ल्हासा बस सेवा सञ्चालन गर्ने सहमित भएको छ । दुइ देशका वाणिज्य सचिव स्तरीय बैठकमा काठमाडौं–ल्हासा पुनः बस सेवा सञ्चालन गर्ने सहमित भएको हो ।
माघको ६ र ७ गते चीनको ल्हासामा सम्पन्न तेस्रो वाणिज्य सचिव स्तरीय बैठकमा काठमाडौं–ल्हासा बस सेवा सञ्चालन गर्ने सहमित भएको हो । यसबाहेक उक्त बैठकमा द्विपक्षीय व्यापार, लगानी, पारवहन, भन्सार सहजीकरण, प्राविधिक सहकार्य र व्यापार पूर्वाधार विकास सम्बन्धी छलफल भएको उद्योग, वाणिज्य तथा आपूर्ति मन्त्रालयले जनाएको छ ।
बैठकमा नेपाली प्रतिनिधिमण्डलको नेतृत्व उद्योग, वाणिज्य तथा आपूर्ति मन्त्रालयका सचिव डा. रामप्रसाद घिमिरेले गरेका थिए । चीनियाँ प्रतिनिधिमण्डलको नेतृत्व सिजाङ जनसरकारका उपाध्यक्ष चाओ पेङले गरेका थिए ।
दुवै पक्षबीच चौथो बैठक सन् २०२७ मा नेपालमा आयोजना गर्ने सहमति भएको छ ।
