सरकारले असोज १ गतेबाट सवारी साधनमा इम्बोस्ड नम्बर प्लेट अनिवार्य गर्ने गरी सोही अनुसारका सूचना जारी गरेपछि सार्वजनिक यातायात केन्द्रीय महासंघले असन्तुष्टि जनाएको छ । नेपाली भाषालाई वेवास्ता गर्दै इम्बोस्ड नम्बर राख्न जारी गरिएको उर्दी मान्य नहुने भन्दै महासंघले जबरजस्ती गर्न खोजिए परिस्थिति जटिल बन्ने चेतावनी दिएको छ ।
महासंघको तर्फबाट विज्ञप्ति जारी गर्दै महासचिव भरत नेपालले जबरजस्ती इम्बोस्ड नम्बर प्लेट जडान गर्न खोजिए महासंघले प्रतिकार गर्ने र त्यसबाट उत्पन्न परिस्थितिको जिम्मेवार यातायात मन्त्रालय हुने चेतावनी दिएका छन् ।
ठोस आधार बिना र व्यवसायी तथा सवारी साधन धनीलाई थप आर्थिक भार पार्ने गरी विदेशी ठेकेदार सँगको मिलेमतोमा इम्बोस्ड नम्बर प्लेट अनिवार्य गर्न खोजिएको बताउँदै महासंघले सार्वजनिक, पर्यटन, ढुवानी र निजी सवारी साधनमा इम्बोस्ड नम्बर जडान नगर्न पनि अनुरोध गरेको छ ।
