नेपाल चेम्बर अफ कमर्सले आगामी आर्थिक वर्षको बजेटमार्फत सुनमा लगाइएको २ प्रतिशत विलासिता कर बहुमूल्य पत्थरमा लगाइएको १३ प्रतिशत भ्याट सम्बन्धि प्रावधान पुनरावलोकन गर्न आग्रह गरेको छ । चेम्बरले अर्थमन्त्री विष्णु पौडेलसमक्ष यस्तो आग्रह गरेको हो ।
सुनमा प्रस्ताव गरिएको २ प्रतिशत विलासिता कर र हिरा लगायत बहुमूल्य पत्थरमा लगाइएको १३ प्रतिशत मूल्य अभिवृद्धि कर अव्यवहारिक र उपभोक्तामा समेत गम्भिर असर गर्ने खालको भएकाले पुनरावलोकन गर्न चेम्बरले अर्थमन्त्री पौडेलको ध्यानाकर्षण गराएको हो ।
चेम्बरका अध्यक्ष कमलेश कुमार अग्रवाल नेतृत्वको पदाधिकारी टोलीले सिंहदरवारमा अर्थमन्त्री पौडेलसमक्ष बजेटमा उल्लेखित विलासिता कर र भ्याट पुनरावलोकनको व्यवस्था वर्तमान आर्थिक अवस्थाको प्रतिकुल हुने बताएको छ ।
सरकारको कर नीतिले नीतिले सुनचाँदी तथा रत्न आभूषणको व्यवसाय नै संचालन गर्न नसकिने र यो क्षेत्रमा लाखौं जनशक्तिले रोजगारी समेत गुमाउने अवस्था आएकाले सरकारको निर्णय पुनरावलोकन गर्न अध्यक्ष अग्रवालले अर्थमन्त्री पौडेलको ध्यानाकर्षण गराए ।
चेम्बर पदाधिकारीहरुसंगको भेटका क्रममा अर्थमन्त्री पौडेलले चेम्बर अफ कमर्सले दिएको सुझावलाई आफूले गम्भिरताका साथ लिने प्रतिवद्धता जनाए । उनले सरोकारवाला निकायसँग छलफल गरेर समस्या समाधान गर्ने आश्वासन दिएका छन् ।
