भीम घिमिरे
गत भाद्र २३ र २४ गते (सेप्टेम्बर ८ र ९ मा) हाम्रो जेनेरेशन जेडका युवाहरूले भ्रष्टाचारविरुद्ध आवाज उठाउँदै उज्ज्वल भविष्यको लागि गरेको आन्दोलनले असल र उच्च उद्देश्य बोकेको थियो । यस्ता सकारात्मक दृष्टिकोणबाट भएका शान्तिपूर्ण अभियानप्रति हाम्रो पूर्ण समर्थन छ र भविष्यमा पनि रहनेछ । यस आन्दोलनका क्रममा शहीद भएका वीर युवाहरूप्रति हामी गहिरो श्रद्धाञ्जली अर्पण गर्दछौं । उनीहरूको साहस न्याय र परिवर्तनको मूल्यको सदैव स्मरण रहनेछ ।
तर, यसै क्रममा हाम्रा संस्थापक अध्यक्ष बिनोद चौधरीसहित व्यवसायीहरु मीन बहादुर गुरुङ, हेमराज ढकाल लगायतका निजी उद्योग तथा व्यवसायिक प्रतिष्ठान, निवास, पसल, शोरुम तथा अन्य सम्पत्तिहरूमाथि आगजनी र तोडफोड भयो । उद्योगी व्यवसायीहरुको मेहनत र समर्पणका प्रतीकका रुपमा उभिएका व्यवसायिक प्रतिष्ठान, उद्योग, शोरुम तथा कार्यालयहरुमा अन्यायपूर्ण ढंगले आक्रमण, तोडफोड र आगजनी हुनु अत्यन्तै दुखद र चिन्ताजनक छ । यस्ता घटनाले हाम्रो गम्भीर ध्यानाकर्षण गराएको छ ।
निजी क्षेत्र केवल व्यवसायीहरूको समूह मात्र होइन । यो राष्ट्र विकासको मेरुदण्ड हो । यसले लगानी गर्छ, राजस्व सिर्जना गर्छ, रोजगारी दिन्छ, आवश्यक वस्तु र सेवा उत्पादन गर्छ र आत्मनिर्भर नेपालको सपना अघि बढाउँछ । जीवन धान्ने, परिवारलाई सहयोग गर्ने र अर्थतन्त्रलाई बलियो बनाउने यस्ता संस्थामाथि आक्रमण गर्नु राष्ट्रकै हानी हो । यस्ता कार्यहरू कहिल्यै स्वीकार्य हुन सक्दैनन् ।
राज्यको प्रमुख जिम्मेवारी नागरिकको जीवन र सम्पत्तिको सुरक्षा गर्नु हो, सार्वजनिक र निजी सम्पत्ति दुवैको संरक्षण गर्नु हो, र प्रत्येक नागरिकलाई स्वतन्त्रतापूर्वक बोल्ने, हिँड्ने र व्यवसाय सञ्चालन गर्ने संवैधानिक अधिकारको सुनिश्चितता गर्नु हो । आन्दोलनको नाममा क्षति, त्रास वा हिंसा मच्चाउने व्यक्तिहरू वा समूहलाई छानबिन गरी कानूनी कारबाही गर्नु अपरिहार्य छ ।
इतिहास र विश्वव्यापी अनुभवले देखाएको छ—निजी क्षेत्रको योगदान र सम्मान बिना कुनै देशले दीगो प्रगति र समृद्धि हासिल गर्न सकेको छैन । विश्वभरका सफल देशले लगानीकर्तालाई इज्जत, सुरक्षा र लगानी गर्न हौसला प्रदान गरेका छन् । यही कारणले ती देशहरू प्रगतिशील र समृद्ध भएका छन् । नेपालले पनि यही अभ्यास अपनाउनैपर्छ, यदि हामीले आत्मनिर्भर र समृद्ध भविष्य देख्न चाहन्छौं भने ।
देशका सबैभन्दा ठूलो उद्योगी–उद्यमीहरूको प्रतिनिधि संस्था कन्फेडरेसन अफ नेपालिज इन्डस्ट्रिज (सीएनआई)ले आफ्नो धारणा थप स्पष्ट पार्दै सरोकारवालासँग संवाद, बहस र प्रभावकारी पैरवीमार्फत सहकार्य गर्न आवश्यक ठानेको छ । चाहे अन्तरिम सरकार होस्, जेनेरेशन जेडका साथीहरू, राजनीतिक दलहरू वा अन्य सरोकारवाला, हाम्रो सन्देश स्पष्ट छः राष्ट्रिय विकास र समृद्धिको सवालमा हामी दृढ, सकारात्मक र रचनात्मक छौं ।
हामी सबै सरोकारवालासँग संवाद, बहस र प्रभावकारी पैरवीमार्फत सहकार्य गर्न तयार छौं । यसले भविष्यमा यस्ता दुर्भाग्यपूर्ण घटनाहरू दोहोरिन नदिन, लगानीकर्ताको विश्वास पुनःस्थापित गर्न, रोजगारी सिर्जना बढाउन, राजस्व मजबुत बनाउन र नेपाललाई स्थायी समृद्धिको बाटोमा अघि बढाउन मद्दत गर्नेछ ।
यदि यस्ता विनाशकारी घटनाहरू रोकिएनन् भने परिणाम गम्भीर हुनेछ । उद्योगी पलायन हुन सक्छन्, पूँजी बाहिरिन सक्छ, उत्पादन थुनिन सक्छ, आपूर्ति श्रृंखला भङ्ग हुन सक्छ र आर्थिक गतिविधि अवरुद्ध हुन सक्छ । यसले देशलाई अराजकता र राज्य असफलतामा पुर्याउन सक्छ ।
त्यसैले, हामी सबै मिलेर लगानी सुरक्षित गर्ने, उद्योग व्यवसाय जोगाउने र निजी क्षेत्रको गरिमा कायम राख्ने जिम्मेवारी लिनुपर्छ । यसरी हामी अर्थतन्त्रको आधार मात्र जोगाउने होइन, आफ्ना युवा, श्रमिक र राष्ट्रकै भविष्य सुरक्षित गर्नेछौं ।
आउनुहोस्, हामी सबै मिलेर आत्मनिर्भर र समृद्ध नेपाल निर्माण गरौं ।
(घिमिरे नेपाल उद्योग परिसंघका उपाध्यक्ष हुन् ।)
