दशैँका लागि यसवर्ष गाडीको अग्रिम टिकट बुकिङ नखुल्ने भएको छ । यातायात व्यवस्था विभाग, यातायात व्यवसायी र ट्राफिक प्रहरीहरुबीच छलफलमा ‘यो मितिबाट टिकट बुकिङ सुरु गर्ने’ भन्ने निर्णय नगर्ने सहमति भएको हो ।
‘कम्पनीहरुले क्रमिक रुपमा बुकिङ गर्न पनि थालिसकेका छन्, तर विगतको जस्तो यो मितिबाट खुल्यो है भनेर लामलस्कर लगाएर बुकिङ लिन सकिने अवस्था छैन’ यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले भने, ‘बाटो र परिस्थित हेरेर गाडी उपलब्ध हुने कि नहुने समेत अवस्थाको आँकलन गरेर बुकिङ लिने कुरा भएको छ ।’
उनका अनुसार एउटा निश्चित रुटको परमिट लिएर चलिरहेका गाडीहरु दशैँका लागि कुन दिनबाट देशैभर चल्न दिने भन्ने निर्णय भने हुन बाँकी छ ।
यातायात व्यवस्था विभागका अनुसार यसपाली भाडा पनि नबढाउने सहमति भएको छ । दशैँको मुखमा भाडा बढाउँदा त्यसले सर्वसाधारणमा मर्का पर्ने भएकाले यसपाली व्यवसायीहरुले नै भाडा बढाउनुपर्ने माग राखेका थिएनन् ।
