प्रतिनिधिसभा सदस्य निर्वाचन अन्तर्गत तनहुँ-१ मा रास्वपाका डा. स्वर्णिम वाग्ले विजयी भएका छन्। वाग्ले ३८ हजार ४० मत ल्याएर विजयी भएका हुन्। उनका निकटतम प्रतिस्पर्धी कांग्रेसका गोविन्द भट्टराईले १६ हजार २ सय ३१ मत ल्याए ।
डा. वाग्ले रास्वपाका उपसभापति हुन् । उनलाई भावी अर्थमन्त्रीको रुपमा हेरिएको छ। चुनाव हुनु अघि नै रास्वपाका सभापति रवि लामिछानेले डा. वाग्लेलाई बजेट लेख्न थाल्न भनेका थिए । चुनावको अघिको चुनावी सभामा डा. वाग्लेलाई अर्थमन्त्री बनाउने भन्दै लामिछानेले ‘डाक्टर साहब, आउने वर्षको बजेट लेख्न सुरू गर्नुहोस्।’ भनेका थिए ।
डा. वाग्ले नेपाली कांग्रेस परित्याग गरेर राष्ट्रिय स्वतन्त्र पार्टीमा प्रवेश गरेका हुन् । २०८० सालको उप निर्वाचनमा उनी तनहुँ १ बाट निर्वाचित भएका थिए। उनले राष्ट्रिय योजना आयोगमा उपाध्यक्षको रुपमा काम गरिसकेका छन् ।
