मेलम्ची खानेपानी आयोजनाको पाइप फुटेर सोह्रखुट्टे–बालाजु सडक खण्डमा करिब ११ फिट गहिरो खाल्डो परेको छ । मेलम्ची आयोजनाको पाइप फुट्दा पानीको फोर्सले सडकमै क्षति पुगेपछि सवारी आवागमन पनि प्रभावित भएको छ ।
खाल्डो परको क्षेत्रलाई घेरा लगाएर दायाँ वायाँबाट मात्रै सवारी साधन चलाइएको छ । उपत्यका ट्राफिक प्रहरी कार्यालय रामशाहपथका अनुसार आज बिहान करिब ६ बजेको समयमा खाल्डो परेको हो । मेलम्चीको ४२ इन्चको पाइप फुटेर पानी बाहिर निस्कदा सो क्षेत्र जलमग्न बनेको छ ।
सो खाल्डोमा बिहान पठाओ चालक विकास शाक्यको बा ५० प ३८२ नम्बरको मोटरसाइकल खसेको थियो । मोटरसाइकल खाल्डोमा खसेर डुबे पनि चालक शाक्य भने सकुशल छन् । उक्त मोटरसाइकललाई काठमाडौं महानगरपालिकाका नगर प्रहरी र बारुण यन्त्र कार्यालय न्युरोडको टोलीले क्रेनले तानेर बाहिर निकालेको थियो ।
खाल्डोलाई घेरा हालेर मर्मत गर्ने तयारी भइरहको छ ।
